ប្តីប្រពន្ធមួយគូបោះបង់កូន បញ្ចប់ជីវិតក្នុងភ្នក់ភ្លើង ដោយសារតែ…
ល្បែងស៊ីសងតែងត្រូវបានហាមឃាត់ និង មានកម្រិតទោសពិន័យច្បាស់លាស់នៅតាមប្រទេសជាច្រើន ព្រោះគេជឿ ថា ល្បែងស៊ីសងអាចបង្កគ្រោះថ្នាក់ធំដល់បុគ្គលអ្នកដែលលេងក៏ដូចជាសង្គមទាំងមូល ។ ជាក់ស្តែងមានហេតុការណ៍ដ៏រន្ធត់មួយកើតឡើងនៅប្រទេសម៉ាឡេស៊ីកាលពីពេលថ្មីៗនេះ ដែលប្តីប្រពន្ធមួយគូសម្រេចចិត្តបញ្ចប់ជីវិតខ្លួន ក្រោយជំពាក់គេវ័ណ្ឌកដោយសារតែល្បែង ។ យោងតាមសារព័ត៌មានម៉ាឡេស៊ីបានឱ្យដឹងថា បុរសជាប្តីមានឈ្មោះថា Soh Chong Keat អាយុ ៤១ ឆ្នាំ និង ប្រពន្ធ Low Shock Kim អាយុ ៣៦ ឆ្នាំបានសម្រេចចិត្តធ្វើអត្តឃាតទាំងពីរនាក់ចោលកូនអាយុ ១២ ឆ្នាំ ដោយសុខចិត្តស្លាប់ក្នុងភ្នក់ភ្លើង ក្រោយពីអ្នកទាំងពីរដុតបន្ទប់ជួលរបស់ពួកគេចោល ហើយមិនចាកចេញពីទីនោះ ។
គេបានដឹងថា លោក Soh គឺជាមនុស្សញៀនល្បែងម្នាក់ ហើយដោយសារតែល្បែងធ្វើឱ្យគ្រួសារលោកជំពាក់គេជិត ២.៥០០ ដុល្លារ ។ គេក៏បានដឹងដែរថា នាង Low តែងត្រូវគេបង្គាប់ឱ្យចាកចេញពីប្តី ព្រោះតែទង្វើញៀនល្បែងងើបមុខលែងរួចរបស់ប្តី តែនាងបានបដិសេធ ព្រោះតែនាងស្រឡាញ់ប្តីនាងខ្លាំង ។ លោក Soh គ្មានការងារអ្វីធ្វើឡើយក្រៅពីដើរលេងល្បែង ស្របពេលដែលនាង Low ធ្វើការងារជាលេខានៅក្រុមហ៊ុនមួយកន្លែងដែលមានប្រាក់ខែតិចតួចប៉ុណ្ណោះ ។ មិត្តភក្តិអ្នកទាំងពីរម្នាក់បានឱ្យដឹងដែរថា ពេលដែលលោក Soh ទៅខ្ចីលុយអ្នកចងការនាង Low សុខចិត្តធានាជូនទាំងអស់ ។
មុនថ្ងៃកើតហេតុពីរថ្ងៃ អ្នកជិតខាងរបស់អ្នកទាំងពីរបានឱ្យដឹងថា មានអ្នកចងការប្រាក់មករករឿងពួកគេដល់ផ្ទះជួល ហើយមុនកើតហេតុគេក៏ឃើញនាង Low បានផ្ញើសារទៅបងស្រីផងដែរពីបំណងចង់បញ្ចប់ជីវិតនាង និង ប្តី ។ ពេលដែលបងស្រីនាងបានឃើញសារនេះរឿងហេតុបានផុតទៅហើយ ដោយអ្នកទាំងពីរបានស្លាប់បាត់ទៅហើយ ។ វាជារឿងមួយដ៏គួរឱ្យអាណិតអាសូរ ហើយក៏ជាមេរៀនមួយសម្រាប់អ្នកដែលញៀនល្បែងផ្សេងទៀតផងដែរ យ៉ាងណាក្តីក៏សូមជូនពរឱ្យប្តីប្រពន្ធមួយគូនេះទៅកាន់សុគតិភពផងដែរ ។
(Like & Share ផងដើម្បីទទួលបានពត៌មានថ្មីៗជាច្រើន)
Post a Comment