សាហាវ !!! ទាស់ពាក្យសម្តីគ្នា បន្តិចបន្តួចសោះ… ទាញកាំបិតកាប់បងថ្លៃ

ភ្នំពេញ៖ បុរសម្នាក់ បានទាស់ពាក្យសម្ដីគ្នា ជាមួយនឹងបងថ្លៃ ក៏ទាញកាំបិតដេញកាប់ ក៏ត្រូវសមត្ថកិច្ចចុះទៅឃាត់ខ្លួន កាលពីវេលាម៉ោង៨ និង៣០នាទីព្រឹក ថ្ងៃទី៣០ ខែសីហា ឆ្នាំ២០១៧ នៅក្នុងភូមិព្រែកតាកែវ ឃុំសំរោងធំ ស្រុកកៀនស្វាយ ខេត្តកណ្ដាល។

មន្ត្រីនគរបាលស្រុកកៀនស្វាយ បានឲ្យដឹងថា ជនរងគ្រោះ ឈ្មោះ ដន វាសនា ភេទប្រុស អាយុ៣៧ឆ្នាំ ជនជាតិខ្មែរ មុខរបរជាកសិករ (របួសស្រាលលើដៃខាងឆ្វេង) មានលំនៅភូមិព្រែកតាកែវ ឃុំសំរោងធំ ស្រុកកៀនស្វាយ ខេត្តកណ្ដាល។ រីឯជនសង័្សយ ឈ្មោះ ហ៊ុន ផាន់ណា ហៅ នាង ភេទប្រុស អាយុ៣២ឆ្នាំ ជនជាតិខ្មែរ មុខរបរជាកសិករ មានលំនៅក្នុងភូមិឃុំកើតហេតុ។

មន្ត្រីនគរបាលដដែល បានបន្តថា កន្លងមក ជនរងគ្រោះ និងជនសង័្សយ ត្រូវជាបងប្អូនថ្លៃ ធ្លាប់មានទំនាស់ពាក្យសម្ដីជាមួយគ្នា ជាញឹកញាប់។ លុះមកដល់វេលាម៉ោង ៧និង៣០នាទីយប់ ថ្ងៃទី២៩ ខែសីហា ឆ្នាំ២០១៧ ជនរងគ្រោះបាននាំបងប្អូន មកជុំគ្នាផឹកស្រា ស្រាប់តែជនបង្ក បានកាន់កាំបិតផ្គាក់ ដើរសំដៅមកកាប់បងថ្លៃ បណ្ដាលឲ្យរងរបួសចំខ្នងដៃ ផ្នែកខាងឆ្វេង ជាំហើមប៉ោង រួចរត់គេចខ្លួនបាត់។ រហូតមកដល់ថ្ងៃទី៣០ ខែសីហា ឆ្នាំ២០១៧ ទើបជនរងគ្រោះមកដាក់ពាក្យបណ្តឹងនៅប៉ុស្តិ៍នគរបាលរដ្ឋបាលសំរោងធំ។

ក្រោយទទួលបានពាក្យបណ្តឹង ពីជនរងគ្រោះរួចហើយ កម្លាំងប៉ុស្តិ៍នគរបាលរដ្ឋបាល បានចុះដល់កន្លែងកើតហេតុ និងឃាត់ខ្លួនជនសង័្ស នាំមកមកប៉ុស្តិ៍ ដើម្បីសាកសួរ និងបញ្ជូនមកកាន់អធិការដ្ឋាននគរបាលស្រុក ចាត់ការបន្តតាមនីតិវិធី៕