ដឹងអត់ ជីវិត នាងឃ្មឹប ក្រោយលេចមុខក្នុងសិល្បៈសាជាថ្មី តើមានអ្វីប្រែប្រួលខ្លះ ?

រ៉េន សុធារី ហៅ នាងឃ្មឹប គឺជាតារាកំប្លែងមួយរូប ដែលទើបតែបោះជំហានចូលប្រឡូកក្នុងវិស័យសិល្បៈសាជាថ្មីឡើងវិញ បន្ទាប់ពីនាងបានបាត់មុខពីវិស័យនេះអស់មួយរយៈយ៉ាងយូរមកនោះ ។គេនៅចាំបានថា ពេលដែលតារាកំប្លែង នាងឃ្មឹប បានចាប់ផ្តើមលេចមុខជាថ្មីក្រោយពីបាត់មុខមួយរយៈធំមកនោះ គឺស្ថិតក្នុងស្ថានភាពអាក្រក់ ៣ ផ្សេងគ្នាក្នុងពេលតែមួយ ដោយទីមួយគឺស្ថានភាពគ្រួសារនាងផ្ទាល់ធ្លាក់ចុះដុនដាបជាខ្លាំង រស់គ្មានទីពំនាក់ ហើយស្ទើរតែរកប្រាក់ទិញបាយទទួលទានពុំបាន ។ មួយវិញទៀតគឺគេគ្រប់គ្នាមើលនាងសឹងតែមិនស្គាល់ ដោយសាររូបសម្រស់របស់នាងបានធ្លាក់បាក់ស្រុតយ៉ាងខ្លាំង ពោលគឺមុខឡើងខ្មៅអែ មិនស្រស់ស្អាតដូចកាលពីមុនឡើយ ។ ចំពោះស្ថានភាពដ៏អាក្រក់មួយទៀត គឺរឿងដែលកូនប្រុសបង្កើតរបស់នាងបានជាប់ពាក់ព័ន្ធនឹងរឿងឃាតកម្មសម្លាប់ម្តាយចុង ដែលជាប្រពន្ធក្រោយរបស់នាយ ហុងដា ជាអតីតប្តីខ្លួននោះ ។

នាង ឃ្មឹប បានទទួលរងសម្ពាធផ្លូវចិត្តផ្ទួនៗគ្នាក្នុងរយៈពេលនោះ ប៉ុន្តែក្រោយពីរឿងរ៉ាងបានកើតឡើង និង មានគេដឹងឮពីជីវិត ដែលគ្មានទីពឹងរបស់នាង រួមទាំងកូនប្រុស ដែលផុងខ្លួនក្នុងរឿងឃាតកម្មសម្លាប់ម្តាយចុងរួចមក មហាជនចាប់ផ្តើមមានក្តីអាណិត និង បានផ្តល់ជំនួយឧបត្ថម្ភខ្លះៗជាបន្តបន្ទាប់ដល់រូបនាងដើម្បីដោះទ័ល ក្នុងនោះមានសមាគមមិត្តសិល្បៈស្ម័គ្រចិត្តជួយសង្គមក៏បានជួយយិតយោង និង ទំនុកបម្រុងនាងយ៉ាងច្រើនផងដែរ ។ បន្ទាប់ពីនោះ នាងឃ្មឹប ក៏ត្រូវបានតារាកំប្លែង នាយកុយ ទទួលឱ្យចូលលេងក្នុងក្រុមកំប្លែងរបស់លោកឡើងវិញទៀតផង ។

បន្ទាប់ពីបានចូលលេងក្នុងក្រុមកំប្លែង នាយកុយ ឡើងវិញ នាងឃ្មឹប ក៏ត្រូវបានផលិតករភាពយន្តមួយចំនួនចាប់អារម្មណ៍ និង បានហៅនាងឱ្យថតរឿង ដោយរហូតមកដល់ពេលនេះ នាងឃ្មឹប ទទួលថតរឿងបានចំនួនពីររឿងហើយ ក្នុងនោះមានរឿងភាគរបស់ទូរទស្សន៍ MyTV ដែលគ្រោងចាក់បញ្ចាំងក្នុងពេលឆាប់ៗនេះ ហើយថ្មីៗនេះទៀត នាងបានចុះកិច្ចសន្យាថតរឿងជូនផលិតកម្មរបស់អ្នកនាង ចន ច័ន្ទលក្ខិណា រឿង «បន្តោងឆ្នាំងដី» ។

ខណៈពេលនេះ នាងឃ្មឹប ហាក់មានលំនឹងជីវិតបន្តិចវិញហើយ ក្រោយពីទទួលបានការងារពីវិស័យសិល្បៈជាបន្តបន្ទាប់ និង បានចូលលេងកំប្លែងជាប់លាប់វិញនេះ តែយ៉ាងណា នាងឃ្មឹប នៅតែចង់បានការងារបន្ថែមទៀតដើម្បីបានប្រាក់យិតយោងសេដ្ឋកិច្ចគ្រួសាររបស់នាងឱ្យបានគ្រាន់បើជាងនេះ ព្រោះពេលនេះប្រាក់ដែលនាងរកបាននោះគឺត្រូវចំណាយច្រើនដូចជា ថ្លៃជួលផ្ទះ ថ្លៃម្ហូបអាហារប្រចាំថ្ងៃ មើលថែទំនុកបម្រុងកូនស្រី និង សេសសល់មួយចំនួនទៀតគឺយកទៅផ្គត់ផ្គង់កូនប្រុស ដែលកំពុងជាប់ពន្ធនាគារ ។ នាងឃ្មឹប បានឱ្យដឹងតាមរយៈសារព័ត៌មានមួយថា រាល់ពេលដែលនាងទៅសួរសុខទុក្ខកូនប្រុសម្តងៗ គឺនាងចំណាយអស់ប្រាក់ក្បែរ ២០០ ដុល្លារ ព្រោះនាងត្រូវទិញរបស់របរប្រើប្រាស់មួយចំនួន និង គ្រឿងហូបចុកក្រៀមស្ងួតខ្លះដល់រូបគេ ។

តាមរយៈការចំណាយអស់ទាំងនេះ ក៏ត្រូវទាមទារឱ្យនាងខិតខំរកបន្តទៀតផងដែរ ដើម្បីទទួលបានប្រាក់សម្រាប់ទប់ទល់ និង ចាយវាយបន្ត ។ តាមរយៈសារព័ត៌មានដដែលនោះ នាងឃ្មឹប បានឱ្យដឹងបន្តថា សព្វថ្ងៃនេះនាងមិនចង់ឱ្យខ្លួនមានពេលទំនេរនោះទេ នាងចង់រកការងារឱ្យបានច្រើនជាងនេះ បើសិនជាពេលនេះមានផលិតកម្មណាពេញចិត្ត ឬ អាណិតនាង ហើយហៅនាងថតនោះ នាងមិនបដិសេធឡើយ ពោលគឺនាងយល់ព្រមទទួលទាំងអស់ ។ ជាមួយគ្នានោះដែរ នាងឃ្មឹប ក៏បានថ្លែងអំណរគុណដល់បណ្តារៀមច្បងសិល្បករដែលតែងតែផ្តល់ឱកាសដល់នាងមានមុខក្នុងពិភពសិល្បៈឡើងវិញ មួយវិញទៀតគឺនាងក៏មិនភ្លេចថ្លែងអំណរគុណដល់មហាជនដែលបានជួយឧបត្ថម្ភនាងកាលពីពេលកន្លងមកផងដែរ ៕ សាកល