ស្រវឹងធ្លាក់ភ្នែក ខណៈចេញពីខារ៉ាអូខេ បើករថយន្តបុកផ្ទះប្រជាពលរដ្ឋរបួសមនុស្ស២នាក់ ខូចខាតម៉ូតូចំនួន៩គ្រឿង និងរថយន្ត១គ្រឿង

ខេត្តព្រះសីហនុ ៖ យោងតាមរបាយការណ៍ របស់សមត្ថកិច្ចចរាចរណ៍ នៃស្នងការដ្ឋាន នគរបាលខេត្ត បានឲ្យដឹងថា នៅយប់ថ្ងៃទី១០ ខែកក្កដា ឆ្នាំ២០១៧ វេលាម៉ោង២២:៥០នាទីយប់ លើកំណាត់ផ្លូវ៧មករា ចំណុច ជិតភោជនីយដ្ឋាន សួនសុបិន្ត ស្ថិតនៅក្នុងភូមិ៤ សង្កាត់លេខ៤ ក្រុង/ខេត្តព្រះសីហនុ មានករណីគ្រោះថ្នាក់ចរាចរណ៍មួយកើតឡើង បង្កដោយ រថយន្ត1គ្រឿងម៉ាកLEXUS RX300 ពណ៌ខ្មៅ បើកបរដោយ បុរសជនជាតិចិនម្នាក់ ឈ្មោះ លី សៀវម៉ីង ភេទប្រុស អាយុ២៥ឆ្នាំ មុខរបរ បុគ្គលិកកាស៊ីណូលើភ្នំ មុនកើតហេតុរូបគាត់បានធ្វើដំណើរ ចេញពីផឹកស៊ីនៅខារ៉ាអូខេ (នគរសំរិទ្ធ) លុះដល់ចំណុចខាងលើ ក៏បានបុកចូលផ្ទះប្រជាពលរដ្ឋ ដែលនៅក្បែរផ្លូវ បណ្ដាលឲ្យរងរបួសមនុស្សចំនួន២នាក់ស្រាល ។

ប្រភពសមត្ថកិច្ចដដែល បានបន្តថា ករណីគ្រោះថ្នាក់ចរាចរខាងលើនេះ រថយន្តបង្កបានបុកចូលក្នុងផ្ទះរបស់ប្រជាពលរដ្ឋ បានធ្វើអោយខូចខាតទ្រព្យសម្បត្តិយ៉ាងច្រើនរួមមាន៖ ម៉ូតូចំនួន៩គ្រឿង រថយន្ត១គ្រឿង និងសំភារៈមួយចំនួនទៀត ។ ជាមួយគ្នានោះផងដែរ អ្នកបើកបររថយន្តត្រូវបានសមត្ថកិច្ចត្រួតពិនិត្យរកឃើញមានកំរិតជាតិអាល់កុល ០,៦០mlg\L សមត្ថកិច្ចជំនាញបាននាំខ្លួនជនបង្កខាងលើមកសាកសួរនៅការិយាល័យ នគរបាលចរាចរណ៍ផ្លូវគោក ដើម្បី ចាត់ការតាមនិតិវិធីច្បាប់ ៕