មូលហេតុអ៊ីចឹងសោះ ទើប កុល ដាវី មិនបានសម្តែងបទ«ឱពុកអ្នកក្រ»ជាមួយលោក ខៃ ប្រសិទ្ធ!

ពិធីការិនី ឃឹម ចរិយា ហាក់ទទួលបានការចាប់អារម្មណ៍ខ្លាំង ក្រោយពីបានចូលរួមសម្តែងខារ៉ាអូខេបទ «ឱពុកអ្នកក្រ» ជាមួយអតីតតារាសម្តែង ខៃ ប្រសិទ្ធ ។ ជាមួយគ្នានេះ ក៏មានការបង្ហើបពីសំណាក់មិត្តភក្តិជិតស្និទ្ធរបស់ កុល ដាវី ថា តាមពិតបទចម្រៀងមួយនេះ លោក សាវិន ហ្វីលីព បានជ្រើសយក កុល ដាវី ឱ្យសម្តែងជាមួយលោក ខៃ ប្រសិទ្ធ ទេ តែក្រោយមកនាងក៏អាក់ខានទៅវិញ ។

ដោយសារតួស្រីនៅក្នុងបទចម្រៀងនេះ តម្រូវឱ្យមានភាពសិចស៊ី លោក សាវិន ហ្វីលីព បានសម្រេចជ្រើសយកស្រីស្អាត កុល ដាវី ជាតួស្រីនៅក្នុងបទនេះ ។ តែដោយមានការប្រែប្រួលពេលវេលាថត ទើបមានការដោះដូរតួតែម្តង ។ ក្រៅពី កុល ដាវី ក៏មានការជ្រើសរើស សុវណ្ណ រ៉ាផា និង សូ អេនណា ផងដែរតែកៀកដល់ថ្ងៃថត អ្នកទាំងពីរមានការងាររវល់ ។ ដោយសារបែបនេះហើយ ទើបលោក សាវិន ហ្វីលីព សម្រេចជ្រើសយកស្រីស្អាត ឃឹម ចរិយា វិញម្តង ។

មានទស្សនិកជនមួយចំនួនបានលើកឡើងថា ប្រសិនបើតារាសម្តែងសម្បូរដើមទ្រូង កុល ដាវី បានសម្តែងនៅក្នុងបទមួយនេះ រិតតែមានការទាក់ទាញ ព្រោះមុខមាត់ និង រូបរាងរបស់នាងសក្តិសម និង ស៊ីជាមួយតួស្រីនៅក្នុងបទមួយនេះ ។ អ្វីដែលកត់សម្គាល់់នោះ ចុងក្រោយនេះ កុល ដាវី កាន់តែមានទីផ្សាររីកទូលាយ យ៉ាងណាមិញសព្វថ្ងៃនាងមានឱកាសថតរឿងជាបន្តបន្ទាប់ មានទាំងរឿងដុំ និង រឿងភាគ ។

កុល ដាវី ថែមទាំងបានសាកល្បងថតរឿងខ្មោចថែមទៀតផង ។ សម្រាប់ការចូលរួមនៅក្នុងកម្មវិធីលេងហ្គេមរបស់ស្ថានីយទូរទស្សន៍នានា កុល ដាវី ក៏បានចូលរួមជាញឹកញាប់ដែរ ។ ថ្មីៗនេះនាង និង គូស្នេហ៍ លោក សុខ រក្សា បានចូលរួមលេងហ្គេមនៅស្ថានីយទូរទស្សន៍ម៉ាយធីវីក្នុងកម្មវិធី«ប្តីខ្ញុំខ្លាំង » ។ មហាជនខ្លះឆ្ងល់ថា កម្មវិធីនេះភាគច្រើនមានតែស្វាមិ ភរិយា និង គូដណ្តឹងទេ ដែលមានសិទ្ធិចូលលេង ។ លើកនេះក៏មិនខុសពីលើកមុនដែរ កុល ដាវី នៅតែនិយាយថា រឿងរៀបការគឺនាងមិនភ្លេចទេ គ្រាន់តែមិនទាន់ដល់ពេល ៕