Fabregas បំបែកកំណត់ត្រាបញ្ជូនបាល់១៥លើក បាន២រដូវកាលនៅ BPL

Cesc Fabregas ខ្សែបម្រើរបស់ក្រុម Chelsea បានក្លាយជាកីឡាករដំបូងគេនៅក្នុងប្រវត្តិសាស្ត្រក្របខ័ណ្ឌBarclays Premier League របស់អង់គ្លេស ដែលអាចបញ្ជូនបាល់ឲ្យមិត្តរួមក្រុមស៊ុតបញ្ចូលទី (assists) បានយ៉ាងតិច១៥លើក ក្នុង២រដូវកាលផ្សេងគ្នា។

ចាប់តាំងពីផ្ទេរពីក្លិប Barcelona មកកាន់ Chelsea អតីតតារារបស់ក្រុមកាំភ្លើងធំ Arsenal រូបនេះ បញ្ជូនបាល់ឲ្យមិត្តរួមក្រុមស៊ុតបានដល់ទៅ១៥លើកហើយ គិតត្រឹមពេលតោខៀវយកឈ្នះក្រុម Swansea City ដល់ទៅ ៥-០ កាលពីចុងសប្ដាហ៍កន្លងទៅ។

ចំណែកឯកាលពីរដូវកាល ២០០៧-២០០៨ ពេលលេងនៅ Arsenal ខ្សែបម្រើអេស្ប៉ាញវ័យ២៧ឆ្នាំរូបនេះ បញ្ជូនបាល់បាន១៧ដង និងជួយឲ្យក្រុមរបស់លោក Arsene Wenger បញ្ចប់រដូវកាលនូវចំណាត់ថ្នាក់លេខ៣ ដោយតាមពីក្រោយ Chelsea និងម្ចាស់ជើងឯកManchester United នៅឆ្នាំនោះ។

ទោះជាយ៉ាងណា កីឡាករជម្រើសជាតិអេស្ប៉ាញរូបនេះ ពុំទាន់អាចបំបែកកំណត់ត្រាបញ្ជូនបានច្រើនជាងគេរបស់ Thierry Henry (២០លើក) នៅឡើយទេ ពោលគឺនៅខ្វះតែចំនួន ៥លើកទៀតតែប៉ុណ្ណោះនឹងតាមទាន់ហើយ ខណៈដែលការប្រកួតនៅចំនួន១៦លើកទៀត ទើបចប់រដូវកាល។