Man Utd យល់ព្រមចុះហត្ថលេខាជាមួយ Blind
Daley Blind នឹងក្លាយជាកីឡាករចំណូលថ្មីទី៥របស់ Man Utd នារដូវកាលនេះ។ AFP
Man Utd យល់ព្រមចុះហត្ថលេខាជាមួយ Blind
ក្រុងមេនឆេស្ទ័រ: ក្លិប Manchester United បានប្រកាសកាលពីថ្ងៃសៅរ៍ថា ពួកគេបានឈានដល់កិច្ចព្រមព្រៀងគ្នាមួយដើម្បីចុះហត្ថលេខាជាមួយនឹងខ្សែការពារស្លាបឆ្វេងអន្តរជាតិហូឡង់ Daley Blind ពីក្លិប Ajax។
Man United បានឲ្យដឹងក្នុងសេចក្តីថ្លែងការណ៍មួយនៅលើបណ្តាញសង្គម Twitter របស់ក្លិបថា៖ «MUFC បានឈានដល់កិច្ចព្រមព្រៀងជាមួយនឹងក្លិប Ajax ដើម្បីចុះហត្ថលេខាជាមួយ Daley Blind បន្ទាប់ពីការត្រួតពិនិត្យសុខភាព និងការយល់ព្រមលើលក្ខខណ្ឌផ្ទាល់ខ្លួនផ្សេងៗ។
ការប្រកាសបន្ថែមទៀតនឹងត្រូវធ្វើឡើងនៅពេលដំណើរការនេះត្រូវបានបំពេញជាស្ថាពរ»។ Blind វ័យ២៤ឆ្នាំ បានស្ថិតក្នុងក្រុមចូលរួម World Cup នៅប្រទេសប្រេស៊ីលរបស់លោក Louis van Gaal ដែលគ្រូបង្វឹករបស់ Man United និងបានជួយឲ្យក្រុមជម្រើសជាតិហូឡង់បានឈានទៅវគ្គពាក់កណ្តាលផ្តាច់ព្រ័ត្រ ខណៈដែលរូបគេអាចលេងជាខ្សែការពារស្លាបឆ្វេង និងខ្សែបម្រើការពារ។ ខណៈដែលរូបគេនឹងត្រូវយល់ព្រមលើលក្ខខណ្ឌផ្ទាល់ខ្លួន និងឆ្លងផុតការត្រួតពិនិត្យសុខភាព Blind ត្រៀមខ្លួនរួចជាស្រេចដើម្បីក្លាយជាកីឡាករចំណូលថ្មីទី៥របស់ Man United ស្របពេលលោក Van Gaal ខិតខំព្យាយាមជួសជុលក្លិបមួយនេះ។
ក្រោយពី Man United ទទួលបានលទ្ធផលស្មើ ០-០ នៅលើទឹកដីក្រុម Burnley ក្នុងការប្រកួតក្របខ័ណ្ឌ Premier League កាលពីថ្ងៃសៅរ៍ លោក Van Gaal បានឲ្យដឹងថា៖ «រូបគេនឹងមកទីក្រុង Manchester ដើម្បីត្រួតពិនិត្យសុខភាព ហើយបន្ទាប់មក យើងអាចនឹងមានកីឡាករថ្មីម្នាក់»។
Man United បានចំណាយប្រាក់រួចជាស្រេចប្រមាណជា១៣០លានផោន (ស្មើនឹង២១៥លានដុល្លារអាមេរិក) ទៅលើកីឡាករថ្មី ក្នុងនោះរាប់បញ្ចូលទាំងការចំណាយប្រាក់លើតម្លៃខ្លួនជាកំណត់ត្រារបស់អង់គ្លេសចំនួន៥៩,៩លានផោនដើម្បីចុះហត្ថលេខាជាមួយខ្សែបម្រើស្លាបអន្តរជាតិអាហ្សង់ទីន Angel di Maria ដែលបានបង្ហាញខ្លួនជាលើកទី១របស់គេនៅពេលប្រកួតជាមួយក្រុម Burnley។
ពួកគេក៏បានចុះហត្ថលេខាជាមួយនឹងខ្សែការពារស្លាបឆ្វេងអន្តរជាតិអង់គ្លេស Luke Shaw ពីក្លិប Southampton ខ្សែបម្រើអន្តរជាតិអេស្ប៉ាញ Ander Herrera ពីក្លិប Athletic Bilbao និងខ្សែការពារ Marcos Rojo ដែលជាមិត្តរួមជាតិរបស់ Di Maria ពីក្លិប Sporting Lisbon ផងដែរ។
កាសែតហូឡង់បានរាយការណ៍ថា Blind នឹងមានតម្លៃខ្លួនពី១៨លានអឺរ៉ូ (ស្មើនឹង២៣,៦លានដុល្លារ) ទៅ២០លានអឺរ៉ូ៕
Post a Comment