ដឹងថាហេតុអី Balotelli តែងតែពាក់អាវលេខ៤៥ទេ? គឺដោយសារ…
Mario Balotelli ខ្សែប្រយុទ្ធថ្មីរបស់ក្លិបហង្សក្រហម Liverpool ដែលទើបផ្ទេរពី AC Milan ក្នុងតម្លៃ១៦លានផោន(២៦,៥លានដុល្លារអាមេរិក) នឹងពាក់អាវលេខ៤៥ ដែលជាលេខសំណព្វចិត្តរបស់គេតាំងពីនៅ Inter Milan, Manchester City និង AC Milan។
កីឡាករជម្រើសជាតិអ៊ីតាលីវ័យ២៤ឆ្នាំរូបនេះដែលជាសមាជិកថ្មីទី៩របស់ Liverpool ក្នុងរដូវកាលថ្មីនេះ និយាយលើគេហទំព័ររបស់ក្លិបថា៖ “ពេលខ្ញុំលេងបីឬបួនប្រកួតដំបូងឱ្យ Inter Milan កាលខ្ញុំនៅក្មេង ខ្ញុំពាក់លេខ៤៥ពីព្រោះលេខអាវសម្រាប់កីឡាករយុវជនជាលេខធំៗចាប់ពី៣៦ដល់៥០។ ខ្ញុំជ្រើសយកលេខ៤៥នៅពេលនោះដោយសារខ្ញុំលេងសើចជាមួយមិត្តភ័ក្ដិថា៤បូក៥ស្មើ៩ ហើយខ្ញុំតែងតែស៊ុតចូលគ្រប់ការប្រកួតទាំង៤នៅ Inter Milan នោះ។ លេខនេះនាំសំណាងល្អដល់ខ្ញុំ អីចឹងហើយទើបខ្ញុំជ្រើសរើសលេខនេះរហូតមក”។
ការត្រលប់មកប្រកបអាជីពនៅ Premier League ជាលើកទី២របស់ Balotelli ដូច្នេះកើតឡើងបន្ទាប់ពីផ្លាស់ពី Man City ទៅលេងឱ្យ AC Milan នៅអ៊ីតាលីរយៈពេល១ឆ្នាំកន្លះ ជាទីដែលអតីតយុវជនក្លិប Lumezzane រូបនេះស៊ុតបញ្ចូលទីបាន៣០គ្រាប់ក្នុងការចូលលេង៥៤លើក។ នៅក្រុមជម្រើសជាតិអ៊ីតាលីវិញ កីឡាករជនជាតិដើមហ្គាណាដែលកើតនៅទីក្រុង Palermo នេះចូលលេងបាន៣៣លើក ស៊ុតបញ្ចូលទីបាន១៣គ្រាប់តាំងពីជាប់ឈុតធំក្នុងឆ្នាំ២០១០មក៕
Post a Comment