២ដូរ១រវាង Spurs និង Swansea

1:27 PM កីឡា, កីឡាអន្តរជាតិ

ក្រុមមាន់ខ្នាយមាស Tottenham Hotspur យល់ព្រមលក់ខ្សែបម្រើ Gylfi Sigurdsson ឱ្យ Swansea បន្ទាប់ពី Swansea យល់ព្រមលក់អ្នកចាំទី Michel Vorm និងខ្សែការពារ Ben Davies មកឱ្យខ្លួន។

ខ្សែការពារឆ្វេងជម្រើសជាតិវេល Davies ចុះកិច្ចសន្យារយៈពេល៥ឆ្នាំក្នុងតម្លៃបិទជិតមួយជាមួយ Spurs រីឯអ្នកចាំទីជម្រើសជាតិហុល្លង់ Vorm ចុះកិច្ចសន្យា៤ឆ្នាំជាមួយក្លិបដែលមានមូលដ្ឋាននៅទីក្រុងឡុងដុង នេះ។

ខ្សែ បម្រើជម្រើសជាតិអ៊ីស្លង់ Sigurdsson ដែលធ្លាប់លេងលក្ខណៈខ្ចីជើងនៅ Swansea ពីក្រុម Hoffenheim ក្នុងឆ្នាំ២០១២ វិលត្រលប់ទៅកាន់ក្លិបមានមូលដ្ឋានក្នុងប្រទេសវេលនេះជាលើកទី២ ដោយចុះកិច្ចសន្យា៤ឆ្នាំ ក្រោយចំណាយពេល២រដូវកាលនៅ Spurs។

មួយ រយៈនេះ Swansea បាត់បង់កីឡាករមួយចំនួនដូចជាខ្សែប្រយុទ្ធអន្តរជាតិអេស្ប៉ាញ Michu បានទៅចូលរួម Napoli ក្រោមកិច្ចសន្យាខ្ចីជើងមួយរដូវកាលហើយអាចនឹងផ្ទេរទៅរួមរស់នៅ ក្លិបដែលបង្វឹកដោយលោក Rafael Benitez ជាអចិន្ត្រៃយ៍ផងនាពេលខាងមុខ ស្របពេល Pablo Hernandez អាចនឹងផ្លាស់ទៅលេងឱ្យក្លិប Al Arabi របស់កាតារក្នុងពេលឆាប់ៗ។

តែ ទន្ទឹមនេះ អ្នកចាត់ការ Garry Monk ក៏ទិញបានកីឡាករមួយចំនួនមករួមក្រុមដែរ ដូចជាអ្នកចាំទី Lukasz Fabianski ពី Arsenal, ខ្សែប្រយុទ្ធអន្តរជាតិបារាំង Bafetimbi Gomis ពី Lyon និង Marvin Emnes ពី Middlesbrough៕