Mario Mandzukic ​នឹង​នាំ​យុទ្ធសាស្ត្រ​ថ្មី​​​ឱ្យ​ Atletico ​ផ្សេង​ពី ​Diego Costa

ខ្សែ​ប្រយុទ្ធ​ថ្មី​របស់​ Atletico Madrid, Mario Mandzukic ​បាន​និយាយ​នៅក្នុង​ពិធី​បង្ហាញ​ខ្លួន​ថា​ការ​មក​ដល់​របស់​លោក​នឹង​នាំ​មក​ នូវ​យុទ្ធសាស្ត្រ​​ប្រយុទ្ធ​ផ្សេង​ពី​កីឡាករ​ Diego Costa។

ជយលាភី ​កីឡាករ​ល្អ​បំផុត​របស់​ក្រូអាត​ប្រចាំ​ឆ្នាំ​២០១២​និង​២០១៣​រូប​នេះ​​ សង្កត់​ធ្ងន់​ថា​៖ “កីឡាករ​ទាំង​អស់​មាន​របៀប​លេង​ខុសៗ​គ្នា​ តែ​សម្រាប់​ខ្ញុំ ​ខ្ញុំ​តែងតែ​ធ្វើ​តាម​អ្វី​ដែល​អ្នក​ចាត់ការ​ត្រូវការ​និង​បង្ហាត់បង្រៀន។ ខ្ញុំ​ដឹង​ច្បាស់​ពី​ប្រ​វត្តិ​របស់​លោក​ Simone ​លោក​ជា​អតីត​កីឡាករ​ដ៏​អស្ចារ្យ​ហើយ​ខ្ញុំ​មាន​ជំនឿ​ចិត្ត​១០០%​ទៅលើ​ គាត់”។

អ្នកចាត់ ​ការ​ក្រុម​ការពារ​តំណែង​ជើងឯក La Liga ​លោក ​Diego Simeone ក៏​និយាយ​ក្នុង​​សន្និសីទកាសែត​ដែរ​ថា​ ​​Diego Costa ​ជាកីឡាករ​ល្អ​ដែល​អាច​ជួយ​ក្រុម​ឈ្នះ​ពាន​រង្វាន់​ La Liga ​ហើយ​អាច​នាំ​ក្រុម​ឈាន​ដល់​វគ្គ​ផ្តាច់ព្រ័ត្ត​ Champions League ទៀត​ផង។ ​ខ្សែ​ប្រយុទ្ធ​ដើម​កំណើត​ប្រេស៊ីល​តែ​លេង​ឱ្យ​ជម្រើស​ជាតិ​អេស្ប៉ាញ​រូប​ នេះ​ជា​កីឡាករ​ដែល​អាច​រក​គ្រាប់​បាល់​បាន​៣៦គ្រាប់​ក្នុង​ការចូល​លេង​២៧​ដង ​នៅ​លីក​ក្នុង​ស្រុក​នៅ​រដូវ​កាល​២០១៣-២០១៤។ ​ប៉ុន្តែ​ចំពោះ​ Mandzukic​ គឺ​ខុស​គ្នា​ ​និយាយ​ឱ្យ​ចំ​គឺ​​អតីត​ខ្សែ​ប្រយុទ្ធ​ក្លិប​ Dinamo Zagreb, Wolfsburg ​និង​ Bayern Munich ​រូប​នេះ​ជា​អ្នក​នាំ​លេង​យ៉ាង​ល្អ​នៅ​ក្នុង​ក្រុម​ហើយ​អាច​ផ្លាស់​ប្ដូរ​ បាន​គ្រប់​កាលៈទេសៈ។

កីឡាករ ​​ជម្រើស​ជាតិ​ក្រូអាត​វ័យ​២៨​ឆ្នាំ​មក​ដល់​ទឹកដី​ Vicente Calderon​ ក្នុង​តម្លៃ​ខ្លួន​១៥​លាន​អឺរ៉ូ​បន្ទាប់​ពី​ការ​ចាក​ចេញ​របស់​ Diego Costa ​ទៅ​តោខៀវ​ Chelsea ​កាលពី​ដើម​ខែ​កក្កដា​នេះ។ Mandzukic​ ផ្ដើម​អាជីព​ដំបូង​នៅ​ក្លិប​ Marsonia ​របស់​ក្រូអាត​ក្នុង​ឆ្នាំ​២០០៤ ​បន្ទាប់​មក​​លេង​ឱ្យ NK Zagreb និង Dinamo Zagreb មុន​ផ្លាស់​មក​ប្រឡូក​អាជីព​នៅ​លីក​កំពូល​អាល្លឺម៉ង់​ដោយ​ចូល​រួម Wolfsburg ក្នុង​ឆ្នាំ​២០១០ មុន​ត្រូវ​ Bayern Munich ​ទិញ​យក​នៅ​ឆ្នាំ​២០១២។ អំឡុង​ពេល​នៅ​ទឹកដី​អាល្លឺម៉ង់​ខ្សែ​ប្រយុទ្ធ​រូប​នេះ​បាន​ជួយ​ឲ្យ​ Bayern ​ឈ្នះ​ពាន​ Bundesliga ​២​ដង​ជាប់​គ្នា DFB Pokal ​២​ដង​ជាប់​គ្នា UEFA Champions League ​ម្ដង UEFA Super Cup ​ម្ដង ​និង​ FIFA Club World Cup ម្ដង៕​