សួស វីហ្សា ខ្លាចរងគ្រោះព្រោះស្នេហាត្រីកោណ
ភ្នំពេញៈ បន្ទាប់ពីជូតទឹកភ្នែករឿងស្នេហាបរាជ័យគូដណ្តឹងរៀបការចោលមិនទាន់ស្ងួតស្រួលផង ស្រាប់តែគេល្បីតៗគ្នាថា តារាចម្រៀងនាង សួស វីហ្សា បានជួបនឹងស្នេហាថ្មីជាមនុស្សមានទ្រព្យស្តុកស្តម្ភ។ ជាមួយគ្នានោះ គេក៏ល្បីផងដែរថា គូស្នេហ៍ថ្មីស្រីស្រស់រូបនេះជាមនុស្សមានប្រពន្ធ និងកូនរួចទៅហើយ។ ប៉ុន្តែយ៉ាងណា ចំពោះព័ត៌មាននេះ បានធ្វើឲ្យ សួស វីហ្សា រអាចិត្ត ហើយក៏លើកឡើងនូវការបារម្ភថា នាងខ្លាចរងគ្រោះព្រោះស្នេហាត្រីកោណ។
ជុំវិញជីវិតស្នេហារបស់តារាចម្រៀងប្រចាំផលិតកម្មរស្មីហង្សមាស នាង សួស វីហ្សា នៅតែមានគេលើកឡើងថា នៅពេលនេះ ស្នេហារបស់នាងនៅតែមានភាពផ្អែមល្ហែម ដោយការលាក់បាំងពីភ្នែកទស្សនិកជន។ ប្រភពមួយពីអ្នកសិល្បៈបានបង្ហើបឲ្យដឹងថា នៅពេលនេះ សួស វីហ្សា បានភ្ជាប់ចំណងស្នេហាថ្មីជាមួយបុរសម្នាក់ ហើយគេក៏បានដឹងថា បុរសម្នាក់នោះជាមនុស្សម្នាក់មានទ្រព្យសម្បត្តិមិនចាញ់នឹងស៊េរីឧកញ៉ានោះទេ។
គួរបញ្ជាក់ថា នៅក្នុងអំឡុងគ្រាដែលតារាចម្រៀងស្រីសាច់សខ្ចីនាង សួស វីហ្សា បែកបាក់ស្នេហាជាមួយនឹងគូដណ្តឹងជាអ្នកសិល្បៈដូចគ្នាលោក មាស សាឡី នោះ គេបានដឹងថា តារារូបនេះស្ថិតនៅក្រោមក្រសែភ្នែកដ៏មុតស្រួចរបស់បុរសចាយទ្រព្យពេញដៃម្នាក់ បោះពាក្យបោះសម្តីសុំក្តីស្នេហា តែភ្លាមនោះគេក៏បានដឹងផងដែរថា បុរសម្នាក់នោះជាបុរសមានប្រពន្ធ និងកូនរួចទៅហើយ។
ថ្មីៗនេះ មានគេលើកឡើងថា សួស វីហ្សា នៅតែមានស្នេហាយ៉ាងស្អិតល្មួតជាមួយបុរសម្នាក់ តែគេមិនច្បាស់ថា តើបុរសម្នាក់នោះជាមនុស្សដែលគេលើកឡើងថា មានប្រពន្ធកូនរួចនោះមែន ឬក៏យ៉ាងណានោះទេ។ ដូច្នេះហើយទើបគេនៅតែចោទសួរជាថ្មីថា តើ សួស វីហ្សា មានទំនាក់ទំនងស្នេហាប្តីគេមែន ឬយ៉ាងណា?
ជុំវិញការលើកឡើងពាក់ព័ន្ធនឹងចំណងស្នេហាតារារូបនេះ ភ្នំពេញ ប៉ុស្តិ៍ មិនអាចទាក់ទងសុំការបំភ្លឺបានទេពីម្សិលមិញ ដោយសារតែគ្មានអ្នកលើកទូរស័ព្ទ។ ប៉ុន្តែកន្លងមក នាងធ្លាប់សម្តែងការបារម្ភនៅពេលដែលមានគេនិយាយដល់ចំណងស្នេហាត្រីកោណ។
សួស វីហ្សា ធ្លាប់ប្រាប់សារព័ត៌មានក្នុងស្រុកថា ដោយសារតែធ្លាប់ឃើញមេរៀនដែលធ្លាប់កើតឡើងចំពោះជីវិតសិល្បករមួយចំនួនកន្លងមក នាងពិតជាភ័យខ្លាចចំពោះសុវត្ថិភាពនៅពេលមានគេលើកឡើងថា រូបនាងមានស្នេហាត្រីកោណ ខណៈរូបនាងមិនបានដឹងរឿងនោះ។
វីហ្សា ធ្លាប់និយាយថា៖«រឿងស្នេហាអីនោះ ខ្ញុំមិនធ្លាប់ដឹងអីសោះ នៅពេលអ៊ីចឹង ខ្ញុំខ្លាចណាស់ ពេលនេះ ខ្ញុំអត់ចង់គិតរឿងស្នេហាទេ គឺគិតតែរឿងសិល្បៈប៉ុណ្ណោះ»៕
Post a Comment