សារ៉ាយ សក្ខណា ប្ដីមិនឲ្យធ្វើតួឯក
ភ្នំពេញ: ខណៈអ្នកស្រី ផាន់ សម្ផស្ស នៅតែបង្ហាញជំហរមុតមាំពីការវិលត្រឡប់មកប្រទេសកំណើតរបស់ សារ៉ាយ សក្ខណា ដើម្បីមកទទួលតំណែងតួឯកកុនតាមការរង់ចាំរបស់ផលិតករនោះ ដំណឹងឆ្លងទ្វីបហើរ ពីដែនដីសហរដ្ឋអាមេរិកបានបង្ហើរមកថា តារាសម្តែងស្រីសម្បុរស្រអែមរូបនេះ ខកដំណើរមិនបានវិលមកស្រុកខ្មែរតាមការគ្រោងទុកនោះអាចមិនមែនមកពីឯកសារនៅសហរដ្ឋទេ វាអាចជារឿងបុគ្គលច្រើនជាង។
ជុំវិញការខកខានដំណើរមិនបានវិលមកតាមការគ្រោងទុករបស់ សារ៉ាយ សក្ខណា នោះអ្នកស្រី ផាន់ សម្ផស្ស ម្តាយនាងបានអះអាងថា ៖«ដំបូង សក្ខណា ត្រូវទទួលហ្គ្រីនកាត ដែលជាឯកសារអាចឡើងចុះសហរដ្ឋអាមេរិកដោយសេរី មុនទទួលសញ្ជាតិអាមេរិក តាំងពីអំឡុងខែមិថុនាម្ល៉េះ ដោយសារតែមានស្វាមីនាងជាមេធាវីគាត់ជាអ្នកដាក់ពាក្យរត់ច្បាប់ឲ្យ។ ប៉ុន្តែហ្គ្រីនកាតដែលត្រូវចេញឲ្យ សក្ខណា ដែលរំពឹងធ្លាក់ ខែកក្កដា ត្រូវខាងមន្ត្រីអាមេរិកពន្យារពេលចេញឲ្យ»។
ខណៈខែកក្កដា ក៏រំកិលជិតនឹងដាច់ផុតទៀតនោះ ហើយដំណឹងពីការវិលមកទទួលតំណែងតួឯកកុនរបស់កូនស្រីនៅតែមិនមានសញ្ញាវិជ្ជមានដដែល អ្នកស្រីសម្ផស្ស បានប្រាប់ថា៖ «សក្ខណា មិនអាចមកស្រុកខ្មែរបានតាមការគ្រោងទុកនោះទេ ហើយរហូតមកទល់ពេលនេះក៏នៅមិនទាន់ដឹងថាគម្រោងនេះនឹងត្រូវបន្តពន្យារដល់ពេលណានោះទេ»។
ទោះបីយ៉ាងណា ជុំវិញការខកខានដំណើរមកលេងស្រុករបស់កូនស្រីនោះ មិនត្រូវបានអ្នកស្រី ផាន់ សម្ផស្ស បង្ហាញហេតុផលផ្សេងក្រៅពីអះអាងថា មកពីខាងមន្ត្រីអាមេរិកមិនទម្លាក់ឯកសារចេញ ហ្គ្រីកាត នោះទេ ដោយអ្នកស្រីបញ្ជាក់ថា៖ «តាមនីតិវិធីប្តីរត់ការនោះ សក្ខណា នឹងត្រូវទទួលបានហ្គ្រីនកាត មុនទទួលសញ្ជាតិអាមេរិក តាំងតែពីអំឡុងខែមិថុនាមកម្ល៉េះទើបនាងហ៊ានទទួលការសម្ដែងរឿងឲ្យផលិតកម្មនៅកម្ពុជាអំឡុងខែកក្កដានេះ»។
បើទោះជាត្រូវបានពន្យារដំណើរមួយលើកជាពីរលើក ហើយមកទល់ពេលនេះក៏មិនទាន់កំណត់កាលបរិច្ឆេទជាក់លាក់ក៏ដោយ ក៏ម្តាយរបស់តារាសម្តែងស្រីរូបនេះ នៅតែអះអាងថា គម្រោងនេះក៏មិនបានរំសាយដែរ។
អ្នកស្រី ផាន់ សម្ផស្ស ប្រាប់ថា៖ «ដោយគ្រាន់តែលើកពេលទៅខែបន្តបន្ទាប់ទៀត ហើយតំណែងតួឯកនោះក៏ប្រហែលជាមិនបាត់បង់ទាំងអស់នោះដែរ»។
ដោយឡែកប្រភពពីអ្នករស់នៅសហរដ្ឋអាមេរិក បានបង្ហើបចម្លើយហាក់ផ្ទុយពីការអះអាងរបស់អ្នកស្រី ផាន់ សម្ផស្ស ដែលថា អ្នកនាង សារ៉ាយ សក្ខណា មិនអាចវិលមកស្រុកកំណើតតាមការគ្រោងនោះ ដោយសារមន្ត្រីសហរដ្ឋអាមេរិក មិនទាន់ចេញហ្គ្រីនកាតឲ្យ។
តាមរយៈការឆ្លើយឆ្លងក្នុងទំព័រហ្វេសប៊ុក ប្រភពពីដែនដី សហរដ្ឋអាមេរិកលើកឡើងថា៖ «រឿង សក្ខណា ដែលថាខកដំណើរមិនបានមកស្រុកខ្មែរតាមគម្រោងរបស់នាងនោះ ខ្ញុំដឹងមិនច្បាស់ដែរ តែខ្ញុំដឹងខ្លះៗថា រឿងនោះអាចប្តីនាងមិនទាន់ចង់ឲ្យនាងចុះមកម្នាក់ឯងច្រើនជាង»។
ប្រភពតាមហ្វេសប៊ុកលើកឡើងថា៖ «ដោយសារតែប្តីនាងជាមេធាវី រឿងរត់ការធ្វើហ្គ្រីនកាត នោះដូចជាមិនពិបាកមែន តែឆ្ងល់ត្រង់ថា ឮម្តាយនាងថា មន្ត្រីសហរដ្ឋអាមេរិកមិនទម្លាក់ឯកសារធ្វើកាត ដូចជាមិនមែន»។
បន្ថែមលើការលើកឡើងនោះ ប្រភពដដែលនោះក៏បាននិយាយថា៖ «បើទោះជាខ្ញុំមនុស្សប្រុសម្នាក់ដែរ ក៏មិនឲ្យប្រពន្ធទើបរៀបការថ្មីថ្មោង ត្រឡប់មកលេងស្រុកម្នាក់ឯងអ៊ីចឹងដែរ យ៉ាងណាក៏ចាំមកជាមួយគ្នាដែរ ហើយក៏មិនចង់ឲ្យប្តីទៅចោលក្នុងពេលហ្នឹងដែរ»។
បញ្ជាក់ពីការលើកឡើងរបស់ប្រភពខាងលើនេះ អ្នកស្រី ផាន់ សម្ផស្ស បានថ្លែងការពារកូនប្រសារបស់ខ្លួនដោយលើកឡើងថា៖ «កូនប្រសាខ្ញុំ ដ្បិតថា ទើបស្គាល់ ប៉ុន្តែខ្ញុំដឹងថា ចិត្តគេមិនដល់ថ្នាក់ហ្នឹងទេ»។
អ្នកម្ដាយតារាសម្ដែងសម្បុរស្រអែមរូបនេះបានថ្លែងថា៖ «រឿងផ្សេងខ្ញុំមិនសូវដឹងមែន តែខ្ញុំដឹងថា រឿងខកខានដំណើររបស់ សក្ខណា គឺពិតជារង់ចាំ ហ្គ្រីនកាតនេះមែន ហើយបើបានពេលណាប្តីគេមិនឃាត់ទេ។ បើមិនមានពេលជូនមកក៏ប្តីគេឲ្យ សក្ខណា មកម្នាក់ឯងដែរ»៕
Post a Comment