ឌុច លីដា ហ៊ានថតស្រាតនៅក្នុងតម្លៃខ្លួនដ៏ខ្ពស់?
ភ្នំពេញៈ ការបញ្ចេញល្វែងលើនៅក្នុងឈុតងូតទឹកជ្រោះដ៏ត្រជាក់ល្ហឹមរបស់តារាសម្តែងស្រីវ័យក្មេងនាង ឌុច លីដា នៅក្នុងភាពយន្តខ្នាតធំប្រចាំឆ្នាំមួយ ត្រូវបានអ្នកទស្សនាបញ្ជាក់ឲ្យដឹងថា តារារូបនេះថតស្រាតបញ្ចេញសាច់ល្វែងលើពិតៗ ដោយសារតែតារារូបនេះបានទទួលតម្លៃខ្លួនយ៉ាងខ្ពស់។
មួយរយៈចុងក្រោយនេះ នាង ឌុច លីដា បានហក់ឡើងកូដខ្លាំងនៅក្នុងពិភពសម្តែង ហើយភាគច្រើននាងទទួលបានងារជាតួឯកនៅក្នុងភាពយន្តខ្នាតធំ។ អ្វីដែលគេចាប់អារម្មណ៍ខ្លាំងបំផុតនោះ គឺ ឌុច លីដា បានប្រជែងយកតំណែងតួឯកស្រីនៅក្នុងភាពយន្តខ្នាតធំបំផុតរបស់ខ្មែរ គឺរឿង «ស្បែកគង់» ដែលភាពយន្តមួយនេះ ត្រូវបានគេដឹងថា បានចំណាយទុនវិនិយោគរហូតដល់ទៅ ៦៨ ម៉ឺនដុល្លារ។
ក្រៅពីល្បីរឿង ឌុច លីដា ទទួលបានតម្លៃខ្លួនខ្ពស់ ថ្មីៗនេះ ទស្សនិកជនក៏បានសម្តែងការភ្ញាក់ផ្អើលនៅពេលពួកគេបានឃើញវីដេអូខ្លីៗនៃសាច់រឿង (Trailer) ពិសេសទេពកោសល្យសម្តែងដ៏រស់រវើករបស់តារាសម្តែងស្រីនាង ឌុច លីដា ផងដែរ ហើយភ្លាមនោះ ឌុច លីដា បានទទួលការកោតសរសើរយ៉ាងខ្លាំងនៅពេលពួកគេគិតថា តារាស្រីរូបនេះហ៊ានថតស្រាតនៅក្នុងឈុតមួយ។
កញ្ញា ឌុច លីដា ក្រោយធ្វើសន្និសីទសារព័ត៌មានស្តីអំពីរឿងដំរីមរកត។ រូបថត សេត គឹមសឿន
ឈុតដែលបានធ្វើឲ្យទស្សនិកជនមានការភ្ញាក់ផ្អើលស្រៀវស្រើបហើបជើងពីដីស្ទើរទប់ស្មារតីមិនបាននោះ គឺនៅពេលពួកគេបានឃើញពីសកម្មភាពតារាសម្តែងនាង ឌុច លីដា បានដោះអាវបញ្ចេញសាច់ខ្ចីមួយល្វែងលើនៅកណ្តាលវាលនៅចំពោះមុខតារាសម្តែងប្រុសលោក អ៊ុន សិទ្ធា នៅក្នុងឈុតចុះងូតទឹកជ្រោះដ៏ថ្លាឈ្វេងលើភ្នំគូលែន។
ថ្វីដ្បិតតែឃើញសាច់ខ្ចីម៉ដ្ឋរលោងរបស់ ឌុច លីដា នៅក្នុងឈុតនោះតែពីខាងក្រោយខ្នងក្តី តែទាំងអ្នកសិល្បៈ និងអ្នកទស្សនាបានលើកឡើងថា តារារូបនេះ ពិតជាហ៊ានស្រាតមួយល្វែងលើពិតៗ ដោយសារតែមានអ្នកទម្លាយថាតារារូបនេះបានកុងត្រាថតជាមួយក្រុមហ៊ុនអង្គរភីកឈ័រ ក្នុងតម្លៃខ្លួនមួយខ្ពស់។
ពាក់ព័ន្ធនឹងព័ត៌មានរំជើបរំជួលថា តារាស្រីរូបនេះហ៊ានថតស្រាត ដើម្បីប្រជាប្រិយភាពនោះ តារាត្រេមុខកូនកាត់នាង ឌុច លីដា នៅមិនទាន់បានបកស្រាយបង្ហាញការពិតនៅឡើយ ខណៈ ភ្នំពេញ ប៉ុស្តិ៍ ព្យាយាមភ្ជាប់ទំនាក់ទំនងទៅនាង បែរជានាងមិនលើកទូរស័ព្ទ។
ប៉ុន្តែយ៉ាងណានៅជុំវិញការលើកឡើងនោះ អ្នកបច្ចេកទេសថតរឿង ស្បែកគង់ បានបញ្ជាក់ថា នោះជាបច្ចេកទេសថតដ៏បិុនប្រសប់របស់ក្រុមហ៊ុនដែលបានធ្វើឡើងដើម្បីឲ្យទិដ្ឋភាពសាច់រឿងមើលទៅដូចជាការពិត ពោលគឺមិនមែន ឌុច លីដា ថតស្រាតនោះទេ៕
ឈុតមួយដែលគេថា ឌុច លីដា ហ៊ានស្រាត។
Post a Comment