Atletico ឡើងជួប Real ក្រោយស៊ី Chelsea ៣-១

Atletico Madrid បានឡើងទៅជួបគូប្រជែងមកពីទីក្រុងជាមួយគ្នា Real Madrid នៅវគ្គផ្ដាច់ព្រ័ត្រ UEFA Champions League ក្រោយវាយបកយកឈ្នះតោខៀវ Chelsea ៣-១។ នេះគឺជាលើកទី១ហើយក្នុងរយៈពេល៤០ឆ្នាំចុងក្រោយ ដែល Atletico អាចត្រួសត្រាយផ្លូវរហូតដល់ថ្ងៃផ្ដាច់ព្រ័ត្រ ខណៈលើកចុងក្រោយគឺកាលពីឆ្នាំ១៩៧៤។

ក្រោយស្មើគ្នា ០-០ នៅជើងទី១នៅអេស្ប៉ាញ អតីតខ្សែប្រយុទ្ធរបស់ Atletico, Fernando Torres បានស៊ុតឲ្យក្រុមម្ចាស់ផ្ទះតោខៀវនាំមុខមុននៅ Stamford Bridge ក្នុងនាទី៣៦។ ប៉ុន្តែក្រុមមកពីទីក្រុងឡុងដុង ប្រទេសអង់គ្លេសមួយនេះបានរក្សាការនាំមុខបានតែ៨នាទីប៉ុណ្ណោះ ក្រោយត្រូវ Adrian Lopez ស៊ុតតាមស្មើវិញនៅ១នាទីចុងតង់ទី១។ ១នាទីនេះហើយ ដែលត្រូវបានលោក Jose Mourinho ពិពណ៌នាថាជាការផ្លាស់ប្ដូរការប្រកួតទាំងមូល។

ចូលតង់ទី២ ក្រុមលោក Diego Simeone ដែលបានត្រឹមស្មើ ១-១ ក៏ជាប់ដែរនោះ បានបន្ថែម២គ្រាប់ទៀត ដោយការស៊ុតបាល់ពិន័យ១១ម៉ែត្រ របស់ Diego Costa នៅនាទី៦០ និងការស៊ុតរបស់ Arda Turan នៅនាទី៧២។

បន្ថែមលើការឡើងដល់វគ្គផ្ដាច់ព្រ័ត្រពានរង្វាន់លំដាប់ទី១ទ្វីបអឺរ៉ុបមួយនេះ Atletico ក៏ធ្វើបានល្អដែរនៅពានក្នុងស្រុកដែរ ពោលគឺត្រូវការឈ្នះតែ២ប្រកួតទៀតប៉ុណ្ណោះដើម្បីលើកពាន La Liga លើកដំបូងក្នុងរយៈពេល១៨ឆ្នាំ។

ការប្រកួតវគ្គផ្ដាច់ព្រ័ត្ររវាងក្រុមមកពីទីក្រុង Madrid ទាំង២ នឹងធ្វើឡើងនៅថ្ងៃទី២៤ ខែឧសភា នៅទីក្រុង Lisbon ប្រទេសព័រទុយហ្គាល់។ តើក្រុម Madrid មួយណា នឹងក្លាយជាជើងឯកឆ្នាំនេះ?