Real Madrid សងសឹក Bayern Munich នៅ Bernabeu បានអត់រាត្រីនេះ?
កីឡាករក្រុម Real Madrid កំពុងពោរពេញដោយទឹកចិត្តចង់ឈ្នះក្រុមការពារតំណែងជើងឯក Bayern Munich ក្នុងជើងទី១វគ្គពាក់កណ្ដាលផ្ដាច់ព្រ័ត្រនៅកីឡដ្ឋាន Santiago Bernabeu ម៉ោង១:៤៥រំលងអាធ្រាត្រនេះដើម្បីសងភាពឈឺចាប់ដែល Bayern ទម្លាក់ពួកគេដោយការស៊ុតបាល់ប៉េណាល់ទីកាត់សេចក្ដីនៅទីនេះក្នុងវគ្គនេះនារដូវកាល២០១១-១២។ តែទោះយ៉ាងណា លោក Josep Guardiola ដែលធ្លាប់មានប្រវត្តិជូរចត់ជាមួយ Real កាលនៅដឹកនាំ Barcelona នោះ ក៏រំពឹងថាអាចនាំជើងឯក៥សម័យកាល Bayern ឱ្យក្លាយជាក្រុមដំបូងគេដែលអាចការពារជើងឯក Champions League បានសម្រេច ចាប់តាំងពី AC Milan ធ្លាប់ធ្វើបានក្នុងរដូវកាល១៩៨៨-៨៩ និង១៩៨៩-៩០ មក។ ដូច្នេះលទ្ធផលនឹងទៅជាបែបណា?
ព័ត៌មានជើងកីឡាករ
ខ្សែប្រយុទ្ធ Cristiano Ronaldo បានវិលមកហ្វឹកហាត់វិញហើយ ប៉ុន្តែគ្រូបង្វឹកក្រុម Real Madrid លោក Carlo Ancelotti និយាយថាលោកនឹងមិនប្រថុយប្រថានដាក់ Ronaldo ចូលលេងក្នុងជើងទី១នេះទេប្រសិនបើរបួសរបស់គេមិនទាន់ជាមួយរយភាគរយនោះ។ ប្រធានក្រុមជម្រើសជាតិព័រទុយហ្គាល់រូបនេះខានបានចូលលេងតាំងពីថ្ងៃទី២មេសាមកម្ល៉េះ ពោលគឺតាំងពីរងរបួសជង្គង់ឆ្វេងពេលលេងជើងទី១វគ្គ៨ក្រុមចុងក្រោយទល់នឹង Borussia Dortmund មក។ រីឯកម្លាំងសំខាន់ម្នាក់ទៀតគឺ Gareth Bale កំពុងស្ថិតក្នុងភាពស្រពិចស្រពិលហើយអាចនឹងមិនបានចូលលេងដោយសារតែកើតជំងឺផ្ដាសាយ។
សម្រាប់ Bayern វិញ ខ្សែបម្រើ Bastian Schweinsteiger និង Javi Martinez វិលមកជួយក្រុមវិញបានហើយក្រោយពីជាប់បម្រាមដែលរារាំងពួកគេមិនឱ្យចូលលេងជើងទី២ទល់នឹងក្រុមបិសាចក្រហម Man Utd។ ប្រធានក្រុម Philipp Lahm ដែលលោក Guardiola ដាក់ឱ្យលេងតួនាទីបម្រើការពារជាញឹកញយនោះ ទំនងជាត្រូវប្ដូរទៅលេងតួនាទីដើមវិញគឺការពារស្ដាំ។
រឿងមួយចំនួនដែលគួរដឹង
Real Madrid និង Bayern Munich ធ្លាប់ប៉ះគ្នា១៤ដងនៅ Champions League ដែលក្នុងនោះ Bayern ឈ្នះ៨ដង ប៉ុន្តែ Bayern ចាញ់រហូតក្នុងការធ្វើដំណើរទៅប្រកួត UCL នៅ Bernabeu ៥ដងចុងក្រោយ (បូករួមទាំងការចាញ់ Inter Milan ក្នុងវគ្គផ្ដាច់ព្រ័ត្រឆ្នាំ២០១០ផងដែរ)។
នេះជាលើកទី៤ជាប់ៗគ្នាដែល Real Madrid ឡើងដល់វគ្គ៤ក្រុមចុងក្រោយ UCL ប៉ុន្តែពួកគេឡើងមិនដល់វគ្គផ្ដាច់ព្រ័ត្រឡើយតាំងពីឆ្នាំ២០០២មក។
Real Madrid មិនដែលចាញ់ឡើយក្នុងការប្រកួត UCL ក្នុងទឹកដីខ្លួនឯង១៧ប្រកួតចុងក្រោយ ពោលគឺឈ្នះ១៥ប្រកួតនិងស្មើ២ប្រកួត ហើយគ្មានប្រកួតណាដែលពួកគេមិនស៊ុតចូលគូបដិបក្ខឡើយ សរុបជារួមពួកគេស៊ុតចូល៥៥គ្រាប់ពីការប្រកួត១៧ដងនោះ។
Real Madrid ជាក្រុមដែលស៊ុតបញ្ចូលទីគូប្រកួតបានច្រើនជាងគេនៅ UCL រដូវកាលនេះ តែក៏ជាក្រុមដែលរបូតគ្រាប់បាល់ច្រើនជាងគេក្នុងចំណោមក្រុមទាំង៤ដែលឡើងដល់វគ្គពាក់កណ្ដាលផ្ដាច់ព្រ័ត្រនេះដែរ។
Bayern Munich តែងតែស៊ុតបញ្ចូលទីគូប្រកួតបានជានិច្ចក្នុងការប្រកួត UCL ១៥លើកចុងក្រោយ។ រីឯគ្រាប់បាល់ទាំង៧ដែល Bayern ស៊ុតចូលក្នុងវគ្គ knockout រដូវកាលនេះគឺកើតឡើងចាប់ពីនាទីទី៥៤ឡើងទៅ។
៨៨%នៃគ្រាប់បាល់ដែល Bayern របូតនៅ UCL រដូវកាលនេះកើតឡើងក្នុងតង់ទី២ (៧ក្នុងចំណោម៨គ្រាប់)។
Cristiano Ronaldo ស៊ុតបញ្ចូលទីបាន៣៥គ្រាប់ក្នុងការចូលលេង UCL ២៧ប្រកួតចុងក្រោយ។ សម្រាប់រដូវកាលនេះ Ronaldo ស៊ុតចូល១៤គ្រាប់ហើយ ដែលស្មើទៅនឹងការធ្លាប់ធ្វើបានរបស់ Jose Altafini ក្នុងរដូវកាល១៩៦២-៦៣ និង Lionel Messi ក្នុងរដូវកាល២០១១-១២។
Karim Benzema និង Angel Di Maria ជាអ្នក assist ច្រើនជាងគេនៅ UCL រដូវកាលនេះ ដោយបញ្ជូនបាល់ឱ្យមិត្តរួមក្រុមទាត់ចូល៥លើកម្នាក់ ស្មើទៅនឹង Wayne Rooney របស់ក្រុមបិសាចក្រហម។
Arjen Robben ស៊ុតបញ្ចូលទីបាន៧គ្រាប់និង assist ៥គ្រាប់ ក្នុងការចូលលេង UCL ១១ប្រកួតចុងក្រោយ។
នេះជាលើកទី៥ដែលលោក Carlo Ancelotti ឡើងដល់វគ្គពាក់កណ្ដាលផ្ដាច់ព្រ័ត្រ UCL ក្នុងនាមជាអ្នកចាត់ការ តែជាលើកទី១គិតតាំងពីឆ្នាំ២០០៧មក (ជាមួយ AC Milan ៤ដង និងជាមួយ Real Madrid ម្ដងនេះ)។
លោក Ancelotti មិនដែលដឹកនាំក្រុមលេងចាញ់ Bayern Munich ម្ដងណាឡើយនៅ UCL (ឈ្នះ៤ដង ស្មើ២ដងកាលនៅដឹកនាំ AC Milan)។
នេះក៏ជាលើកទី៥ដែរសម្រាប់លោក Pep Guardiola ដែលឡើងដល់វគ្គពាក់កណ្ដាលផ្ដាច់ព្រ័ត្រក្នុងនាមជាអ្នកចាត់ការក្រុម ខណៈ៤លើកកន្លងមកគឺពេលលោកធ្វើអ្នកចាត់ការ Barcelona។
លោក Guardiola ធ្លាប់ចាញ់តែ២ដងប៉ុណ្ណោះក្នុងការដឹកនាំក្រុមប្រកួតជាមួយ Real Madrid ១៥ប្រកួតកន្លងមក (ឈ្នះ៩ដង ស្មើ៤ដង)។
Post a Comment