គេថា តោខៀវលេងក្បួនចតឡានក្រុង ដើម្បីទប់ស្មើ ០-០ នៅទឹកដី Atletico យប់មិញ

ក្រុមតោខៀវ Chelsea បានទប់ស្មើ ០-០ នៅទឹកដីក្រុមអេស្ប៉ាញកំពុងឡើងជើង Atletico Madrid នៅជើងទី១ វគ្គពាក់កណ្ដាលផ្ដាច់ព្រ័ត្រ UEFA Champions League យប់មិញនេះ។

ក្រោយការប្រកួតស្មើនេះ មានសារព័ត៌មានអន្តរជាតិមួយចំនួនបានលើកឡើងថា លោក Jose Mourinho ប្រើក្បួនចតឡានក្រុងមុខទីខ្លួនឯង ពោលគឺចង់សំដៅលើការដាក់ខ្សែការពារច្រើន ដើម្បីទប់ការវាយសម្រុករបស់ Atletico។

នៅក្នុងការប្រកួតនេះ អ្នកចាំទីដៃទី១ Petr Cech លេងបានតែជាង១០នាទីប៉ុណ្ណោះ ក្រោយរងរបួសស្មា ដោយចូលជំនួសវិញដោយអ្នកចាំទីអូស្រ្ដាលី Mark Schwarzer។ Cech នឹងមិនអាចលេងបានទៀតនោះទេក្នុងរយៈពេលដែលនៅសល់ក្នុងរដូវកាលនេះ បានន័យថាក្នុងជើងទី២នៅ Stamford Bridge សប្ដាហ៍ក្រោយ ក៏មិនអាចចាប់បានដែរ។

ដំណឹងមិនល្អមួយទៀតសម្រាប់ក្រុមអង់គ្លេសមួយនេះ គឺប្រធានក្រុម John Terry ក៏រងរបួសដែរ គឺរបួសជើងដែលធ្វើឲ្យខ្សែការពាររូបនេះ ខកខានមិនបានលេងនាប្រកួតបន្ទាប់នោះដែរ។

ទោះបីជាត្រូវក្រុមម្ចាស់ផ្ទះបុកខ្លាំងយ៉ាងណាក្ដី Chelsea ក៏មានឱកាសល្អខ្លះដែរ ប៉ុន្តែខ្សែបម្រើ Ramires ធ្វើមិនបានសម្រេច។ ចំណែកអ្នកចាំទីជើងចាស់ Schwarzer ដែលធ្វើមិនបានល្អពេល Chelsea ចាញ់ Sunderland នោះ បានរួមចំណែកយ៉ាងធំធេងជាមួយខ្សែការពារដ៏ក្រាស់ ដើម្បីធ្វើឲ្យ Atletico មិនអាចបំប៉ោងសំណាញ់ទីគូប្រកួតបានជាលើកដំបូងក្នុង១១ប្រកួតនៅ Champions League រដូវកាលនេះ។

ការប្រកួតជើងទី២នៅទឹកដី Chelsea នឹងត្រូវធ្វើឡើងនៅថ្ងៃទី៣០ ខែមេសាសប្ដាហ៍ក្រោយ។ ក្រៅពីបាត់បង់ Cech និង Terry ក្រុមលោក Jose Mourinho ក៏ត្រូវបាត់បង់កីឡាករសំខាន់មួយចំនួនទៀតដែរ ដោយសារជាប់ពិន័យ គឺ John Obi Mikel និង Frank Lampard។