គ្រូបង្វឹក Manchester United លោក David Moyes ត្រូវបានបណ្ដេញចេញពីក្រុម
លោក David Moyes អតីតគ្រូបង្វឹកក្លឹប Manchester United (រូបថត៖ telegraph.co.uk)
គ្រូបង្វឹកសញ្ជាតិស្កុតឡែនលោក David Moyes ត្រូវបានម្ចាស់ក្លឹបបិសាចក្រហម Manchester United បណ្តេញចេញ ក្រោយពីលោកដឹកនាំក្លឹបមិនបានល្អ ដោយបាត់បង់ឱកាសក្នុងការដណ្ដើមយក ពានរង្វាន់ផ្សេងៗប្រចាំរដូវកាល ២០១៣-២០១៤ រួមទាំងបាត់បង់កៅអីលំដាប់លេខ៤ ក្នុងក្របខ័ណ្ឌ Barclays Premier League ដែលជាតំណែងដើម្បីទទួលបានសិទ្ធិទៅលេងនៅក្របខ័ណ្ឌ UEFA Champions League នៅរដូវកាលក្រោយដែរ។ លោក David Moyes គឺជាអតីតគ្រូបង្វឹករបស់ ក្លឹប Everton F.C ដែលត្រូវបានអតីតគ្រូបង្វឹកវ័យចំណាស់របស់ក្លឹប Manchester United លោក Alex Ferguson ជ្រើសរើសមកជំនួសតំណែងរបស់លោក ខណៈលោក Alex Ferguson ត្រូវចូលនិវត្តន៍នាចុងរដូវកាលមុន។
អ្នកចាំទីសញ្ជាតិអាមេរិក Tim Howard បានប្រាប់ Daily Telegraph ថា លោកមានការគោរព ចំពោះអ្នកចាត់ការលោក David Moyes យ៉ាងខ្លាំង ដោយលោកគិតថាគាត់គឺជាគ្រូបង្វឹកដ៏អស្ចារ្យម្នាក់ ហើយអ្នកគាំទ្រក្លឹប Everton ទាំងអស់ក៏មិនអាចបំភ្លេចរូបលោកបានដូចគ្នាដែរ។
លោក David Moyes ត្រូវបានជ្រើសតាំងជាគ្រូបង្វឹកថ្មីរបស់ក្លឹប Manchester United កាលពីដើមរដូវកាលឆ្នាំ ២០១៣-២០១៤នេះ ខណៈគ្រូបង្វឹកចាស់លោក Alex Ferguson បានសម្រេចចិត្តចូលនិវត្តន៍ កាលពីចុងរដូវកាលមុន។ ក្នុងការដឹកនាំក្លឹប Manchester United សម្រាប់ពានរង្វាន់ Barclays Premier League រដូវកាល ២០១៣-២០១៤ ចំនួន៣៤ប្រកួតកន្លងមក ក្លឹប Manchester United មាន៥៧ពិន្ទុ ដោយប្រកួតឈ្នះ១៧ ស្មើ៦ និងចាញ់១១ប្រកួត ហើយបានធ្លាក់ចេញក្របខ័ណ្ឌ UEFA Champions League ត្រឹមវគ្គ៨ក្រុមចុងក្រោយ ដោយចាញ់ក្រោមថ្វីជើងក្រុម FC Bayern Munich ដែរ៕
Post a Comment