ហង្សក្រហម Liverpool ខិតជិតទៅគ្រប់គ្រងពាន Barclays English Premier League ជាលើកដំបូង
កីឡាករ Raheem Sterling របស់ក្រុម Liverpoolអបអរការក្រោយពីស៊ុតបញ្ចូលទី (រូបថតពី 7msport.com)
ការប្រកួតម្សិលមិញនេះ ត្រូវបានរៀបចំឡើងនៅកីឡាដ្ឋាន Carrow Road ទឹកដីរបស់ក្រុម Norwich.City។ ក្រុមភ្ញៀវ Liverpool បានធ្វើការវាយសម្រុកយ៉ាងខ្លាំង ទៅលើក្រុមម្ចាស់ផ្ទះ Norwich.City ក្នុងគោលបំណងស្វែងរក ៣ពិន្ទុ ដើម្បីឈានទៅគ្រប់គ្រងដំណែងជើងឯក Barclays English Premier League ជាលើកដំបូងរបស់ខ្លួន។
ការប្រកួតនេះ ចាប់ផ្ដើមបានតែបន្តិចប៉ុណ្ណោះ កីឡាករ Raheem Sterling បានស៊ុតបញ្ជូលទីឲ្យក្រុមភ្ញៀវ Liverpool នាំមុខមុន នៅនាទីទី៤ ។ ក្រោយមក កីឡាករ ខ្សែប្រយុទ្ធឆ្នើម Luis Suares បានស៊ុតគ្រាប់ទី២ ឲ្យក្រុមភ្ញៀវនៅនាទី ១១។
ចូលដល់តង់ទី២ ក្រុមម្ចាស់ផ្ទះ បានស៊ុតមួយគ្រាប់បំបែកពងមាន់របស់ខ្លួននៅនាទី៥៤ ដែលធ្វើបានដោយកីឡាករ Gary Hooper ខណៈកីឡាករ Raheem Sterling ក៏បានស៊ុតបញ្ចូលទី គ្រាប់ទី៣ឲ្យក្រុមភ្ញៀវ នៅនាទី៦២ ដែរ។
ការប្រកួតបន្តដល់នាទី៧៧ ទើបកីឡាករ Robert Snodgrass បានស៊ុតបញ្ចូលទីគ្រាប់ទី២ ឲ្យក្រុមម្ចាស់ផ្ទះ ខណៈក្រុមទាំងពីរ មិនអាចធ្វើអ្វីគ្នាបាននោះ សម្រាប់នាទីដែលនៅសេសសល់ ហើយចប់ការប្រកួត ក្រុមភ្ញៀវបានយកឈ្នះក្រុមម្ចាស់ផ្ទះដោយលទ្ធផល ៣-២។
គួរបញ្ជាក់ថា ក្រោយបញ្ចប់ការប្រកួតសប្ដាហ៍ទី៣៥នេះ ក្រុមហង្សក្រហម Liverpool មាន ៨០ពិន្ទុ ដោយនាំមុខក្រុមលំដាប់ទី២ តោខៀវ Chelsea FC ចំនួន ៥ពិន្ទុ។ ក្រុមហង្សក្រហម Liverpool នៅមាន៣ប្រកួតទៀត មុនបញ្ចប់រដូវកាល ដោយត្រូវធ្វើជាម្ចាស់ផ្ទះស្វាគមន៍ក្រុម Chelsea FC និង Newcastle.United និងត្រូវធ្វើជាភ្ញៀវ ទៅសួរសុខទុក្ខក្រុមម្ចាស់ផ្ទះ Crystal Palace។ ក្រុមហង្សក្រហម Liverpool សង្ឃឹមនឹងយកឈ្នះការប្រកួតដែលនៅសេសសល់របស់ខ្លួន ដើម្បីឈានទៅ លើកពានរង្វាន់ក្លឹបបាល់ទាត់អាជីពរបស់អង់គ្លេសជាលើកដំបូងរបស់ខ្លួន ក្នុងឆ្នាំ ២០១៤នេះ៕
Post a Comment