វ៉ាង ស្រីណូ ប្រកាន់ជំហរចូលសិល្បៈ
តារាសម្តែងនាង វ៉ាង ស្រីណូ។ រូបថត សេត គឹមសឿន
ភ្នំពេញៈ ដំណឹងវិលមកកាន់អាជីពសិល្បៈសម្តែង របស់តារាស្រីម្ចាស់ពាន កំពូលតារាសិចស៊ីកាលពីជាងកន្លះទសវត្សរ៍មុន នាង វ៉ាង ស្រីណូ បានលេចឮជាបន្តបន្ទាប់ ប៉ុន្តែដំណឹងនោះហាក់មានត្រឹមតែចំហាយខ្យល់ មិនមានស្រមោល។ ជាថ្មីម្តងទៀតនៅក្នុងគណនីហ្វេសប៊ុក ស្រីស្រស់ វ៉ាង ស្រីណូ សរសេរប្រាប់ថា ស្រីណូ របស់បងប្អូននឹងត្រៀមខ្លួនវិលរកអាជីពដែលបងប្អូនបានស្គាល់ នាងពីមុនមកវិញហើយ ដោយត្រៀមថតជាខ្សែភាពយន្ត MTV និងស្ប៉តពាណិជ្ជកម្មឡើងវិញហើយ។
នៅក្នុងហ្វេសប៊ុក ក្រៅពីអះអាងថានាងបានត្រៀមខ្លួនថតភាពយន្តឲ្យ MTV តែនាង វ៉ាង ស្រីណូ មិនបានប្រាប់ថា ភាពយន្តដែលនាងគ្រោងឡើងមកស្រាយសម្ពាយយុទ្ធគុណសម្តែងដែលកប់ទុក យូរឆ្នាំនោះជាភាពយន្តដុំ ឬក៏ជាភាពយន្តភាគនោះទេ ហើយក៏មិនបានប្រាប់ជាក់លាក់ពីកាលបរិច្ឆេទ នាងវិលចូលកាន់តំណែងនោះដែរ ។
ប៉ុន្តែនាងបានសរសេរប្រាប់ថា៖ «បងប្អូន មិត្តភក្តិ និង fans ទាំងអស់គ្នា! នៅពេលខាងមុខនេះ ស្រីណូរបស់បងប្អូន នឹងវិលត្រឡប់រកអាជីពចាស់វិញហើយ ដែលកាលពីមុនអាជីពនេះហើយដែលធ្វើឲ្យអ្នកទាំងអស់គ្នាស្គាល់ ខ្ញុំ។ រាល់ថ្ងៃនេះ មានបងៗផលិតករភាពយន្តជាច្រើនបានទាក់ទងឲ្យខ្ញុំវិលរកការថត រឿងដុំ និងភាគបូកទាំងខារ៉ាអូខេផងដែរ »។
ស្រីណូ បានបញ្ជាក់ទៀតថា៖«មិនយូរទេ រាល់ការប្រគំតន្ត្រីតាមបណ្តាស្ថានីយទាំងអស់នឹងមានវត្តមាននាង ខ្ញុំឡើងវិញហើយ ហើយខ្ញុំក៏សង្ឃឹមថានឹងទទួលបានការគាំទ្រឡើងវិញផងដែរ!! ហើយអ្វីដែលភ្ញាក់ផ្អើលនោះ កម្មវិធី i-mission របស់ទូរទស្សន៍បាយ័ន ក៏បានទាក់ទងមកខ្ញុំដែរ ប៉ុន្តែកម្មវិធីនេះហាក់លំបាកណាស់ ព្រោះត្រូវការកម្លាំងគាំទ្រច្រើន បើបងប្អូនមានការគាំទ្រដល់ខ្ញុំ ខ្ញុំក៏ពេញចិត្តនឹងចូលរួមលេងដែរ!! អរគុណ»។
សម្រាប់ការវិលរក ឆ្នាំងចាស់នេះ គេក៏មិនទាន់ដឹងច្បាស់ថា វ៉ាង ស្រីណូ អាចជ្រោងប្រជាប្រិយភាពឲ្យបានដូចមុន ឬយ៉ាងណាទេ ហើយការប្រកាសនោះទៀតសោធត្រូវបានមហាជនអ្នកគាំទ្រនាង លើកឡើងថា មិនមែនជាលើកទីមួយដែរ ដែល វ៉ាង ស្រីណូ ប្រកាសខ្លួនវិលមកទទួលការងារសិល្បៈនោះ។
បើទោះយ៉ាងនេះក្តី មជ្ឈដ្ឋាននិយមគាំទ្រ តារាម្ចាស់ពានសិចស៊ីកាលពីកន្លះទសវត្សរ៍មុនរូបនេះ បែរជាបង្ហាញការចាប់អារម្មណ៍នូវសកម្មភាពដែលគេឃើញនាងធ្វើបុណ្យដាក់ទានជូន លោកយាយ លោកតា នៅតាមទីជនបទ គួរឲ្យកោតសរសើរ និងមានសកម្មភាពយ៉ាងសស្រាក់សស្រាំទៅវិញ»។
ពួកនិយម លេងហ្វេសប៊ុក បានពោលសរសើរថា៖ «ស្រីណូ ដែលជាប់ងារជាតារាសិចស៊ី មិនសំចៃដៃ ពេលនេះហាក់មានសកម្មភាព រស់រវើកជាមួយការធ្វើបុណ្យ ដើរចែកអំណោយ ទៅដល់ចាស់ជរា នៅតាមបណ្តាខេត្ត និងធ្វើបុណ្យស្រោចទឹក លើករាសី ជាមួយក្រុមគ្រួសារ ហើយរំលេចរូបភាព នៅលើបណ្តាញទំនាក់ទំនងសង្គម Facebook ផ្ទាល់របស់នាង »។
នៅ អំឡុងបុណ្យ ចូលឆ្នាំថ្មី ប្រពៃណីខ្មែរ កន្លងទៅថ្មីៗនេះ ស្រីណូ និងក្រុមគ្រួសារ បានពាំនាំយកអំណោយ ជាច្រើនដូចជា សារុង មី ទឹកក្រូច ថវិកា និងសម្ភារមួយចំនួនទៀត ទៅចែកជូនចាស់ជរា រស់នៅក្នុង ខេត្តកំពង់ឆ្នាំង រួមជាមួយការចែកថវិកា ទៅដល់កុមារតូចៗ ក្នុងស្រុកភូមិនោះ គួរឲ្យសរសើរពីទង្វើ របស់សិល្បការិនីរូបនេះ ។ ប៉ុន្តែសកម្មភាពនោះដែរ ត្រូវបានមជ្ឈដ្ឋានអ្នកតាមដានសិល្បៈ និងជាអ្នកគាំទ្រនាង បានបញ្ចេញមតិថា ការខំប្រឹងធ្វើបុណ្យ យកអំណោយថវិកា ចែកជូនដល់យាយចាស់ៗនោះ គឺនាងចង់សន្សំបុណ្យកុសល និងលើករាសីឲ្យខ្ពស់ មុនពេលនាងត្រឡប់ចូលពិភពសិល្បៈវិញ៕
Post a Comment