មនុស្ស៧នាក់រងរបួសក្បាល និងស្រាល ដោយសារក្រុមសន្តិសុខ វាយបំបែកមិនឲ្យប្រមូលផ្តុំនៅទីលានប្រជាធិបតេយ្យ
យ៉ាងហោចណាស់ មនុស្ស៧នាក់ រងរបួសក្បាល និងរបួសស្រាល នៅក្នុងការបំបែកដោយហិង្សាពីសំណាក់ក្រុមសន្តិសុខសាលាខណ្ឌដូនពេញ នៅពេលដែលពួកគេអមបេក្ខជនជាប់ឆ្នោតតំណាងរាស្ត្រគណបក្សសង្គ្រោះជាតិ ចូលទៅកាន់ទីលានប្រជាធិបតេយ្យ ដើម្បីសម្តែងមតិ។
ការបំបែកនេះ ធ្វើឡើងខណៈដែល លោកស្រី មូរ សុខហួរ បេក្ខជនជាប់ឆ្នោតតំណាងរាស្ត្រគណបក្សសង្គ្រោះជាតិ និងអ្នកអមដំណើរលោកស្រីប្រមាណ១០នាក់ បានធ្វើដំណើរទៅកាន់ទីលានប្រជាធិបតេយ្យ នៅម៉ោង ៨:៣០នាទីព្រឹកថ្ងៃចន្ទនេះ ដើម្បីទាមទារឲ្យមានការគោរពសិទ្ធិបញ្ចេញមតិ និងទីតាំងប្រមូលផ្តុំ។
លោក អំ សំអាត អ្នកគ្រប់គ្រងបច្ចេកទេសឃ្លាំមើលការរំលោភសិទ្ធិមនុស្ស អង្គការលីកាដូ ដែលតាមដានករណីនេះ មានប្រសាសន៍ថា ក្នុងការបំបែករបស់ក្រុមសន្តិសុខប្រមាណ ៥០នាក់ទៅលើ លោកស្រី មូរ សុខហួរ និងអ្នកអមដំណើរអ្នកស្រីនោះ បានបណ្តាលឲ្យយុវជនបីនាក់ បានរងរបួសក្បាល និងមនុស្ស៤នាក់ទៀត ដែលក្នុងនោះមានអ្នកសារព័ត៌មានពីរនាក់ផងនោះ បានរងរបួសស្រាល។
លោក អំ សំអាត បានចាត់ទុកទង្វើនេះថាអមនុស្សធម៌ និងសបញ្ជាក់ថា របបប្រជាធិបតេយ្យនៅកម្ពុជា កំពុងដើរថយក្រោយ។
បេក្ខជនជាប់ឆ្នោតតំណាងរាស្ត្រគណបក្សសង្គ្រោះជាតិ លោកស្រី មូរ សុខហួរ ដែលបរាជ័យជាថ្មីម្តងទៀត ក្នុងការទៅសម្តែងមតិនៅទីលានប្រជាធិបតេយ្យនៅព្រឹកថ្ងៃចន្ទនេះ មានប្រសាសន៍ថា លោកស្រីនៅតែបន្ដទៅកាន់ទីលានប្រជាធិបតេយ្យជារៀងរាល់ថ្ងៃ ដើម្បីអនុវត្តសិទ្ធិសម្តែងមតិរបស់ខ្លួន ក្នុងនាមជាពលរដ្ឋ បើទោះជាមានការរារាំងដោយបំពាន និងរំលោភសិទ្ធិពីសំណាក់អាជ្ញាធរក៏ដោយ។ លោកស្រី បានអំពាវនាវមិនឲ្យមានអ្នកអមដំណើរជាមួយលោកស្រីទៀតទេ។
អ្នកនាំពាក្យក្រសួងមហាផ្ទៃ លោក ខៀវ សុភ័ក្រ មានប្រសាសន៍ថា លោកមិនបានទទួលព័ត៌មាននេះទេ ដោយអះអាងថា ជាប់រវល់ប្រជុំ។ តែទោះជាយ៉ាងណា លោកសម្តែងការសោកស្ដាយចំពោះការប៉ះទង្គិចគ្នា ដែលបង្កឲ្យមានអ្នករងរបួសនៅទីលានប្រជាធិបតេយ្យ នៅព្រឹកនេះ។
កាលពីថ្ងៃអាទិត្យម្សិលមិញ បេក្ខជនជាប់ឆ្នោតតំណាងរាស្ត្រគណបក្សសង្គ្រោះជាតិ លោកស្រី មូរ សុខហួរ ក៏ត្រូវបានសមត្ថកិច្ចចម្រុះរាប់រយនាក់ ប្រដាប់ដោយខែល និងដំបង រារាំង និងចាប់សែងចេញ មិនឲ្យចូលទៅកាន់បរិវេណទីលានប្រជាធិបតេយ្យដែរ។
នៅដើមខែមេសានេះ លោកស្រី មូរ សុខហួរ បានធ្វើដំណើរជាច្រើនដង ទៅកាន់ទីលានប្រជាធិបតេយ្យ រៀងរាល់ម៉ោង ៨ព្រឹក ដោយបានអង្គុយផ្ទាល់លើដី អានច្បាប់ស្ដីពីការជួបជុំដោយសន្តិវិធី អប់រំកងកម្លាំងសមត្ថកិច្ចដែលបិទទីលានប្រជាធិបតេយ្យ មិនឲ្យពលរដ្ឋប្រមូលផ្តុំនៅទីនោះ ប៉ុន្តែនៅរាល់ការទៅទីលានប្រជាធិបតេយ្យនោះ ត្រូវបានកម្លាំងសមត្ថកិច្ច រារាំង និងចាប់សែងចេញជាច្រើនដង។
កាលពីថ្ងៃទី៤ ខែមករា ឆ្នាំ២០១៤ ក្រសួងមហាផ្ទៃ បានចេញបម្រាម ហាមឃាត់ការប្រមូលផ្តុំ នៅលើទីលានប្រជាធិតេយ្យ ដែលមានមនុស្សចាប់១០នាក់ឡើងទៅ ក្រោមហេតុផលស្តារសន្តិសុខ និងសណ្តាប់ធ្នាប់សង្គមឡើងវិញ។ ក្រោយការដាក់បម្រាមនេះ កម្លាំងសមត្ថកិច្ចជាច្រើនរយនាក់ ត្រូវបានដាក់ពង្រាយ លើបរិវេណទីលានប្រជាធិបតេយ្យ ហើយរាល់ការប៉ុនប៉ងប្រមូលផ្តុំរបស់ប្រជាពលរដ្ឋ និងកម្មកររោងចក្រ គឺត្រូវបានរារាំង រហូតឈានដល់ការប៉ះទង្គិចគ្នាជាបន្តបន្ទាប់៕
សូមសរសេរមកលោក សុទ្ធ គឹមសឿន តាមរយៈ keomsoeunsoth@gmail.com
Post a Comment