អង្គការការពារធនធានធម្មជាតិ នឹងប្រារព្ធខួប២ឆ្នាំសពលោកឈុត វុទ្ធី នៅថ្ងៃទី២៦ខែមេសា
អង្គការការពារធនធានធម្មជាតិ(NRPG) នឹងប្រារព្ធខួប២ឆ្នាំនៃសពលោក ឈុត វុទ្ធី នាចុងសប្តាហ៍នេះ នៅកន្លែងដែលលោក ឈុត វុទ្ធី ដែលត្រូវបានគេបាញ់សម្លាប់កាលពីថ្ងៃទី២៦ ខែមេសា ឆ្នាំ២០១២ កន្លងមក ក្នុងស្រុកមណ្ឌលសីមា ខេត្តកោះកុង។
នៅក្នុងសេចក្តីប្រកាសព័ត៌មានរបស់អង្គការការពារធនធានធម្មជាតិ ចេញផ្សាយនៅថ្ងៃទី២១ ខែមេសានេះ ឲ្យដឹងថា នៅថ្ងៃទី២៦ ខែមេសា ចុងសប្តាហ៍នេះ ប្រជាពលរដ្ឋ ព្រះសង្ឃ និងមន្ត្រីអង្គការសង្គមស៊ីវិល ប្រមាណ៨០នាក់ នឹងធ្វើពិធីរំលឹកខួបនៃការស្លាប់របស់លោក ឈុត វុទ្ធី អតីតប្រធានអង្គការអង្គការការពារធនធានធម្មជាតិ និងជាសកម្មជនការពារព្រៃឈើ ក្នុងបុព្វហេតុដែលលោកខំប្រឹងការពារព្រៃឈើរបស់ប្រទេសកម្ពុជា នៅចំណុចវាលបី ឃុំបាក់ខ្លង ស្រុកមណ្ឌលសីមា ខេត្តកោះកុង ជាកន្លែងដែលលោក ឈុត វុទ្ធី ដែលត្រូវបានគេបាញ់សម្លាប់។
លោក ឈុត វុទ្ធី សកម្មជនការពារព្រៃឈើ ត្រូវបានជនសង្ស័យជាមន្ត្រីកងរាជអាវុធហត្ថម្នាក់ ឈ្មោះ អ៊ិន រតនា បាញ់សម្លាប់ នៅចំណុចវាលបី ឃុំបាក់ខ្លង ស្រុកមណ្ឌលសីមា ខេត្តកោះកុង កាលពីថ្ងៃទី២៦ ខែមេសា ឆ្នាំ២០១២ នៅពេលដែលរូបលោក និងអ្នកកាសែត The Cambodia Daily ពីរនាក់ចូលទៅថតគំនរឈើ នៅក្រុមហ៊ុន Timber Green ។ ក្នុងហេតុការណ៍នោះដែរ មន្ត្រីកងរាជអាវុធហត្ថឈ្មោះ អ៊ិន រតនា នោះក៏ត្រូវគេបាញ់ស្លាប់ផងដែរ។ សំណុំរឿងនេះ ត្រូវបានតុលាការសាលាដំបូងខេត្តកោះកុង សម្រេចតម្កល់រឿងមិនចាត់ការ ពោលគឺសំណុំរឿងក្តីនោះ ត្រូវបានតុលាការអះអាងថា ឃាតកដែលសម្លាប់លោក ឈុត វុទ្ធី គឺឈ្មោះ អ៊ិន រតនា ហើយឈ្មោះ អ៊ិន រតនា ក៏ត្រូវបានសម្លាប់ដែរ ដូច្នេះបណ្តឹងអាជ្ញាក៏រលត់។
ប៉ុន្តែ តុលាការបានចោទប្រកាន់លើ ប៉េអឹមម្នាក់ទៀត ឈ្មោះ រ៉ាន់ បូរ័ត្ន ថាជាអ្នកសម្លាប់ឈ្មោះ អ៊ិន រតនា ដោយអចេតនា ដោយផ្តន្ទាទោសដាក់ពន្ធនាគារ ២ឆ្នាំ។ ក៏ប៉ុន្តែសាលក្រម នៅថ្ងៃទី២២ ខែតុលា ឆ្នាំ២០១៣ ចៅក្រមតុលាការខេត្តកោះកុង លោក ខាន់ សុផារី បានតម្រូវឲ្យបុរសជាប់ចោទ រ៉ាន់ បូរ័ត្ន ជាប់ពន្ធនាគារត្រឹមតែ ៦ខែប៉ុណ្ណោះ រីឯទោសនៅសល់ ១ឆ្នាំ និង ៦ខែទៀត ត្រូវព្យួរទោស៕
Post a Comment