ពេលវេលា​រីកចម្រើន​របស់​ប្រទេស​មី​យ៉ាន់ម៉ា​​

ចេតិយបិតមាស នៅមីយ៉ានម៉ា (រូបថតពី៖ idgconnect.com)

សេដ្ឋកិច្ច ​ដ៏​រឹងមាំ​មួយ គឺជា​ការទាក់ទាញ​ដ៏​សំខាន់​សម្រាប់​ការវិនិយោគ ​ពី​អន្តរជាតិ​ដោយផ្ទាល់​នៅក្នុង​ប្រទេស​អាស៊ាន និង​ក​ន្លែង​ផ្សេងៗ​ទៀត​នៅក្នុង​អាស៊ី ជាពិសេស​នៅក្នុង​ប្រទេស​មី​យ៉ាន់​ម៉ា ទី​ដែល​កាលពី​ពេល​ថ្មីៗ​កន្លងទៅ​នេះ​បើក​ឲ្យ​មាន​សេដ្ឋកិច្ច​ទីផ្សារសេរី បាន​ធ្វើឲ្យ​រីកចម្រើន​ដល់​ការវិនិយោគ​យ៉ាង​ច្រើន​គួរសម នេះ​បើ​តាម​ប្រសាសន៍​របស់​អ្នក​វិភាគ​​អន្តរជាតិ​។​

វិទ្យាស្ថាន​មូលប័ត្រ និង​កម្មវិធីសិក្សា​អន្តរជាតិ​សង្ឃឹមថា សេដ្ឋកិច្ច​អាស៊ីអាគ្នេយ៍​នឹង​កើនឡើង​ពី ៣​ទៅ​៥%​ជា​រៀង​រាល់ឆ្នាំ​នៅ​ទសវត្សរ៍​ក្រោយ នេះ​បើ​តាម​ប្រសាសន៍​របស់​លោក Thitinan Pongsudhirak ដែល​បាន​ថ្លែង​នៅក្នុង​កិច្ចប្រជុំ​កំពូល​អាស៊ី ណ័​រវេយ កាលពី​ថ្ងៃ​សុក្រ​។ កិច្ចប្រជុំ​កំពូល​រយៈពេល​បី​ថ្ងៃ ដែល​បញ្ចប់​នៅ​ថ្ងៃ​ម្សិលមិញ​ត្រូវបាន​រៀបចំ​ដោយ​ក្រុមប្រឹក្សា​ពាណិជ្ជកម្ម ​ថៃ ណ័​រវេស​។​

Joseph Zveglich ជំនួយការ​ប្រធាន​សេដ្ឋសាស្ត្រ​របស់​ធនា​គារ​អភិវឌ្ឍន៍អាស៊ី ADB ថ្លែងថា ADB ព្យាក​រថា កំណើន​សេដ្ឋកិច្ច GDP អាស៊ាន​ទាំងមូល​នឹង​កើនឡើង ៦.២%​សម្រាប់​ឆ្នាំ​នេះ ហើយ​និង​កើនឡើង ៦.៤ % នៅ​ឆ្នាំ​បន្ទាប់ ដោយ​​ផ្អែក​ទៅលើ​ការរីកចម្រើន​ឡើង​វិញ​ នៃ​សេដ្ឋកិច្ច​របស់​សហរដ្ឋ​អាមេរិក អឺរ៉ុប និង​ជប៉ុន​។​

ប៉ុន្តែ​សម្រាប់​ប្រទេស​ថៃ ADB វាយតម្លៃថា GDP និង​កើនឡើង ២.៩% សម្រាប់​ឆ្នាំ​នេះ ហើយ​នៅ​ឆ្នាំក្រោយ​នឹង​កើនឡើង ៤.៥% ប្រសិន​បើ​ជម្លោះ​នយោបាយ​ត្រូវ​បានដោះស្រាយ​។​

Zaw Oo ប្រធាន​ផ្នែក​ស្រាវជ្រាវ​នៃ​វិទ្យាស្ថាន​ធនធាន​អភិវឌ្ឍន៍​មី​យ៉ាន់​ម៉ា ដែល​មាន​មូលដ្ឋាន​នៅ​ទីក្រុង​យ៉ាង​ហ្គ​ន ថ្លែង​ថា​ការចុះបញ្ជី​សុំ​ការវិនិយោគ​ដោយ​ផ្ទាល់​ពី​បរទេស (FDI) នៅក្នុង​ប្រទេស​មី​យ៉ាន់​ម៉ា កាល​ពី​បី​ឆ្នាំ​កន្លង​ទៅ មាន​ចំនួន​ស្មើ​នឹង​ការសុំ​ចុះបញ្ជី​កាលពី​២៥​ឆ្នាំមុន​។​

​ផលប្រយោជន៍​នៃ​ការប្រកួតប្រជែង​របស់​ ប្រទេស​មី​យ៉ាន់​ម៉ា រួមបញ្ចូល​ទាំង​ធនធានមនុស្ស​វ័យក្មេង​របស់ខ្លួន និង​ទីតាំង​​ភូមិសាស្ត្រ​ដែល​ប្រទេស​នេះ​​ ស្ថិតនៅ​ចន្លោះ​មហា​យក្ស​អាស៊ី​ទាំងពីរ​ដែល​មាន​សក្ដានុពល​សេដ្ឋកិច្ច គឺ​ឥណ្ឌា និង​​ចិន នេះ​បើ​តាម​ប្រសាសន៍​របស់​លោក Zaw Oo ហើយ​លោក​បន្ថែមថា ការប្រកួតប្រជែង​នោះ​គឺ​បំលែង​ការ​វិនិ​យោគ​​ដោយ​ផ្ទាល់​ពី​បរទេស ឲ្យចេញ​ឆ្ងាយ​ពី​ធនធានធម្មជាតិ​របស់​ប្រទេស​។​

លោក Zaw Oo ថ្លែងថា «​យើង​កំពុងតែ​ ព្យាយាម​លើកតម្កើង​ផ្នែក​វាយណភ័ណ្ឌ ផ្នែក​កសិកម្ម និង​ផ្នែក​ទេសចរណ៍ ពី​ព្រោះ​ផ្នែក​ទាំងអស់​នេះ​នាំមក​នូវ​ប្រាក់​កម្រៃ​ច្រើន​ដល់​ពលរដ្ឋ​របស់​ យើង»។​

Ernst Meyer អនុប្រធាន និង​ជា​អ្នក​គ្រប់​គ្រង់​ក្រុមហ៊ុន​ប្រេង និង​ឧស្ម័ន  Southeast Asia at DNV-GL ប្រចាំ​ប្រទេស​មី​យ៉ាន់​ម៉ា ថ្លែងថា ឧស្សាហកម្ម​ថាមពល​របស់​ប្រទេស​នេះ​នៅតែ​ស្ថិត​នៅក្នុង​ដំណាក់កាល​ដំបូង​នៅ​ ឡើយ ក្រោយពេល​ដែល​បើក​ឲ្យមាន​សេដ្ឋកិច្ច​ទីផ្សារ​សេរីកា​លពី​ពេល​ថ្មីៗ​នេះ​។​

​ការព្រួយបារម្ភ​ដ៏​ទទូច និង​ច្រើន​បំផុត​ដែល​បាន​លើកឡើង​នៅក្នុង​កិច្ចប្រជុំ​កំពូល​សេដ្ឋកិច្ច​ អាស៊ី ណ័​រវេយ គឺ​អំពើ​ពុករលួយ ដែល​នៅ​បន្ត​មាន​អត្ថិភាព​នៅឡើយ​។ Deunden Nikomborirak នាយក​ផ្នែក​ស្រាវជ្រាវ នៅ​វិទ្យាស្ថាន​ស្រាវ​ជ្រាវ និង​អភិវឌ្ឍន៍​នៅ​ប្រទេស​ថៃ ថ្លែងថា ប្រទេស​មួយចំនួន​បាន​រារាំង​ការដេញថ្លៃ​គម្រោង​អភិវឌ្ឍន៍​ធំៗ​ របស់​ជាតិ ដោយ​ផ្អែ​ក​ទៅលើ​ច្បាប់​ប្រឆាំង​អំពើពុករលួយ​របស់​ពួកគេ​៕