West Brom ចុះហត្ថលេខាជាមួយ Evans ពី Man United ក្នុងតម្លៃ៦លានផោន

ក្លិប West Bromwich Albion បានបំពេញការចុះហត្ថលេខាជាមួយនឹងខ្សែការពារ Jonny Evans របស់ក្លិប Manchester United។ ខ្សែការពារកណ្តាលវ័យ២៧រូបនេះបានចុះហត្ថលេខារយៈពេល៤ឆ្នាំ និងចូលរួមជាមួយនឹង West Brom ក្រោយពីបានធ្វើការបង្ហាញខ្លួន១៩៨លើកក្នុងរាល់ការប្រកួតទាំងអស់សម្រាប់ Man United។

 វាត្រូវបានគេយល់ឃើញថា តម្លៃខ្លួនសម្រាប់ខ្សែការពារអន្តរជាតិអៀរឡង់ខាងជើងរូបនេះនឹងមានចំនួន៦លានផោន (ស្មើនឹង៩,២លានដុល្លារអាមេរិក) ដែលអាចនឹងកើនដល់៨លានផោនរួមជាមួយនឹងប្រាក់ឧបត្ថម្ភផ្សេងៗ។ Evans បានឈ្នះពានក្របខ័ណ្ឌ Premier League ចំនួន៣លើក ក្រោយពីបានបង្ហាញខ្លួនជាលើកទី១របស់គេសម្រាប់ Man United កាលពីឆ្នាំ២០០៧ ហើយរូបគេបានធ្វើការបង្ហាញខ្លួនជាអន្តរជាតិចំនួន៤២លើកសម្រាប់ប្រទេសរបស់គេ។ លោក Tony Pulis គ្រូបង្វឹករបស់ West Brom បានប្រាប់គេហទំព័ររបស់ក្លិបនេះថា៖ «នេះជាការចុះហត្ថលេខាដ៏អស្ចារ្យមួយសម្រាប់ក្លិបនេះ។ Jonny នឹងនាំយកបទពិសោធជាច្រើន ហើយនិងក្លាយជាកីឡាករដ៏សំខាន់សម្រាប់យើង រូបគេជាកីឡាករដែលខ្ញុំបានស្វែងរកជាយូរមកហើយ។ យើងពិជារីករាយក្នុងការមានរូបគេក្នុងក្រុម»។ Evans បានធ្លាក់ចេញពីការចាប់អារម្មណ៍របស់លោក Louis van Gaal អ្នកចាត់ការទូទៅរបស់ Man United តាមរយៈការលេងត្រឹមតែ១៧លើកគត់កាលពីរដូវកាលមុន និងបានបង្ហាញខ្លួនក្នុងជម្រើសដំបូងត្រឹមតែ១លើកគត់នៅឯកីឡដ្ឋាន Old Trafford នៅរដូវកាលនេះ។ ខ្សែការពារកណ្តាលរូបនេះបានប្រាប់គេហទំព័រក្លិបថ្មីរបស់ពួកគេថា៖ «ខ្ញុំសង្ឃឹមថា នឹងជួយឲ្យ West Brom មានចំណាត់ថ្នាក់កាន់តែខ្ពស់ក្នុងលីកនេះ។ វាជាការប្រជែងថ្មីមួយសម្រាប់ខ្ញុំ ហើយខ្ញុំក៏កំពុងតែសម្លឹងឆ្ពោះទៅមុខផងដែរ។ ខ្ញុំស្គាល់កីឡាករប៉ុន្មាននាក់ដែរ ហើយខ្ញុំបាននិយាយទៅកាន់មនុស្សដែលបានណែនាំក្លិបនេះសម្រាប់ខ្ញុំ»៕

ប្រភពព័ត៌មាន៖ Goal.com