ក្លឹប Newcastle United បង្ហាញពីប្រាក់ចំណេញ 19 លានផោននៅឆ្នាំ 2013-14

9:27 AM កីឡាអន្តរជាតិ

ក្លឹប Newcastle United កាលពីពេលថ្មីៗនេះបានប្រកាសពីប្រាក់ចំណូលប្រចាំឆ្នាំ 2013-14 ដែលរកបានប្រាក់ចំណេញដល់ទៅ 18.7 លានផោន។ លោក Lee Charnley ដែលជាអ្នកដឹកនាំក្លឹបនេះបាននិយាយថា “ក្លឹបនេះទទួលបានការគាំទ្រយ៉ាងខ្លាំង និងជាពិសេសមានស្ថេរភាពខាងលុយផងដែរ។ ការចំណេញនេះធ្វើឲ្យយើងកាន់តែលេងបានយ៉ាងល្អ និងវិវឌ្ឈន៍ទៅមុខជានិច្ច។”

គាត់បានបន្ថែមថា “លទ្ធផលបែបនេះគឺមានន័យថា ក្លឹបរបស់យើងគឺកំពុងតែដើរទៅមុខ។ ពេលនេះយើងអាចមានលទ្ធភាពក្នុងការចំណាយ និងធ្វើជំនួញផ្សេងទៀតបាន។” បច្ចុប្បន្ននេះ ក្លឹប Newcastle បានស្ថិតនៅចំណាត់ថ្នាក់លេខរៀងទី 12 នៅ Premier League ចំនែកប្រាក់ចំណេញកើនឡើងទ្វេរដងកាលពីឆ្នាំ 2013 ដែលរកចំណូលបានត្រឹមតែ 9.9 លានផោនប៉ុណ្ណោះ។

នៅក្នុងខែមិថុនា ប្រាក់ចំណេញបានធ្លាក់ចុះ 0.6 លានផោនក្នុងមួយខែផងដែរ។ ថ្មីៗនេះ ក្លឹប Newcastle ទើបតែលក់កីឡាករខ្សែការពារបារាំង Yohan Cabaye ទៅឲ្យក្លឹប Paris St-Gemain នៅក្នុងតម្លៃខ្លួន 19 លានផោននៅក្នុងខែមករា ឆ្នាំ 2014 ។

សម្រាប់រដូវកាល 2013-14 នេះក្លឹប Newcastle បានទិញបានកីឡាករ 3 នាក់គឺខ្សែប្រយុទ្ធ Loic Remy របស់បារាំង និងកីឡាករ Luuk de Jong របស់ហូឡង់ ជាពិសេសកីឡាករវ័យក្មេង Olivier Kemen របស់បារាំងផងដែរ។ លោក Charnley បានបន្ថែមថា “សេចក្តីតាំងចិត្តរបស់យើងគឺរក្សាតម្លៃសំបុត្រឲ្យនៅស្ថិតស្ថេរ និងធ្វើយ៉ាងណាឲ្យប្រាក់ចំណូលរបស់យើងកើនឡើងជាលំដាប់៕”