Wow! អតីតកីឡាករ Barcelona កំពុងលេចធ្លោនៅលីកអាល្លឺម៉ង់ Thiago មកលេងស្រុកខ្មែរ

កំពូលតារាបាល់ទាត់វ័យក្មេងអេស្ប៉ាញ និងកំពុងលេងនៅលីកកំពូលអាល្លឺម៉ង់ Thiago Alcantara បានមកទស្សនាប្រទេសកម្ពុជាកាលពីពេលថ្មីៗនេះហើយទទួលបានស្វាគមន៍យ៉ាងកក់ក្ដៅពីកុមារកម្ពុជា។

កាលពីម្សិលមិញ នៅលើ Page ផ្លូវការរបស់ខ្លួន កីឡាកររូបនេះបានបង្ហោះរូបភាពមួយសន្លឹកដែលបង្ហាញពីកុមារកម្ពុជាទទួលស្វាគមន៍ និងបានសរសេរថា ៖«ឥទ្ធិពលនៃបាល់ទាត់……សេចក្តីស្រលាញ់របស់ខ្ញុំចំពោះកម្ពុជា។ អរគុណច្រើន!!!»។

រូបថត ដែល Thiago Alcantara បង្ហោះម្សិលមិញ (រូបថត Thiago)

Thiago មិនបានបង្ហាញថា ដំណើរមកប្រទេសកម្ពុជានេះគឺមានគោលបំណងអ្វីនោះទេ ហើយក៏មិនប្រាប់ថានៅកន្លែងណាដែរ។ ទោះជាយ៉ាងណាការបង្ហាញរូបថតមួយសន្លឹករបស់លោកគឺជាការបង្ហាញដល់ពិភពលោកឲ្យបានស្គាល់ប្រទេសកម្ពុជា ខណៈ Page របស់លោកមានអ្នកចុច Like រាប់លាននាក់ទូទាំងពិភពលោក។

Thiago ដែលកើតឆ្នាំ១៩៩១ជាកីឡាករវ័យក្មេងលេចធ្លោរបស់អេស្ប៉ាញ ហើយឆ្នាំ២០១៣រូបគេបានចុះកុងត្រាលេងនៅក្លិបកំពូលអាល្លឺម៉ង់ Bayern Munichជាខ្សែបម្រើកណ្តាល។ មុនចូលទៅលីក Bundesliga កីឡាកររូបនេះបានចូលលេងនៅក្លិបកំពូលអេស្ប៉ាញ FC Barcelona តាំងពីអាយុ១៤ឆ្នាំ។ បន្ទាប់ពីជាប់ឈុត U-19 ដល់ U-21 អេស្ប៉ាញ រូបគេបានចាប់ផ្តើមល្បីល្បាញទូទាំងពិភពនៅឆ្នាំ២០១១៕