ព្យាករណ៍ EPL សប្តាហ៍ទី១៖ Chelsea, Man United រំពឹងថានឹងឈ្នះនៅថ្ងៃបើកឆាក

ស្របពេលដែល Manchester United ត្រូវបានកែសម្រួល និងមានភាពខ្លាំងសាជាថ្មីត្រឹមតែរយៈពេល៤សប្តាហ៍ក្រោមការដឹកនាំរបស់គ្រូបង្វឹកថ្មីលោក Louis Van Gaal និងខណៈដែល Chelsea, Arsenal និង Liverpool បានចំណាយប្រាក់ដ៏ច្រើនលើសលប់ទៅលើកីឡាករថ្មី ក្រុម Man City នឹងប្រឈមមុខជាមួយនឹងភាពស្វិតស្វាញដ៏ធំមួយក្នុងការការពារពានរង្វាន់ Premier League របស់ពួកគេ។ ស្របពេលជាមួយគ្នានេះ ក្រុមទើបតែឡើងមកថ្មីដែលរួមមាន Leicester City, Burnley និង QPR ក៏ប្រឈមមុខនឹងការងារដ៏លំបាកនាថ្ងៃបើកឆាកផងដែរ ខណៈដែលពួកគេសុទ្ធសឹងត្រូវជួបក្រុមលេងក្នុងក្របខ័ណ្ឌកំពូល។ ខាងក្រោមនេះគឺជាការព្យាករសម្រាប់សប្តាហ៍ទី១នៃក្របខ័ណ្ឌ English Premier League របស់ cambosport.com៖

Manchester United v Swansea City 16/08/2014 ម៉ោង 6:45 ល្ងាច

ក្រុមម្ចាស់ផ្ទះ Man United នឹងរំពឹងថា អាចកត់ត្រាជ័យជម្នះនាថ្ងៃបើកឆាកដើម្បីបន្ថែមការជឿជាក់ផ្សេងៗក្រោយពីពួកគេបានលទ្ធផលយ៉ាងល្អក្នុងដំណើរប្រកួតមិត្តភាពមុនបើករដូវកាលនៅលើទឹកដីសហរដ្ឋអាមេរិក ក្នុងនោះរាប់បញ្ចូលទាំងការទទួលជ័យជម្នះ ៣-១ លើក្រុម Real Madrid និងការកត់ត្រាជ័យជម្នះ ៣-១ លើក្រុម Liverpool ដើម្បីលើកពាន International Champions Cup ផងដែរ។ ខណៈដែលអ្នកគាំទ្រ ក៏ដូចជាកីឡាករស្រេកឃ្លាននូវជ័យជម្នះដើម្បីបង្ហាញនូវការកែប្រែមុខមាត់ជាថ្មីក្រោមការដឹកនាំរបស់លោក Louis Van Gaal ពួកគេនឹងបើកការវាយសម្រុកតាំងពីរចាប់ផ្តើមប្រកួតដើម្បីស្វែងរកបីពិន្ទុជាដាច់ខាត។ ក្រុម Swansea នឹងរីករាយក្នុងការបញ្ចប់ត្រឹមលទ្ធផលស្មើ បើទោះបីក្រុមនេះពិតជាធ្លាប់ឈ្នះ Man United ២-១ កាលពីរដូវកាលមុនក្នុង FA Cup ក៏ដោយ។ ហេតុនេះ ក្តីសង្ឃឹមដ៏ធំនឹងធ្លាក់ទៅលើខ្សែប្រយុទ្ធ Wilfried Bony ក្នុងការជួយឲ្យ Swansea គេចផុតពីបរាជ័យ។

manchester-united-and-chelsea-expect-to-win-in-the-open-match-of-epl-2

ជំនួបបីលើកចុងក្រោយរវាងក្រុមទាំងពីរ៖
12/01/14 Manchester United 2-0 Swansea City
06/01/14 Manchester United 1-2 Swansea City
18/08/13 Swansea City 1-4 Manchester United

Queens Park Rangers v Hull City 16/08/2014 ម៉ោង 9 យប់

ការមានប្រៀបផ្សេងៗអាចនឹងធ្លាក់ទៅលើក្រុម QPR ដែលជាក្រុមម្ចាស់ផ្ទះ និងជាក្រុមដែលទើបតែឡើងមកពីក្របខ័ណ្ឌទី២របស់អង់គ្លេស។ ក្រុមទាំងពីរបានទទួលលទ្ធផលពីការប្រកួតមិត្តភាពមុនបើករដូវកាលប្រហាក់ប្រហែលគ្នា ខណៈដែល QPR បានកត់ត្រាជ័យជម្នះ៤លើក ចាញ់ និងស្មើ២ ក្នុងចំណោម៨ប្រកួត ហើយ Hull បានទទួលជ័យជម្នះ២លើក និងស្មើ៣ ក្នុងចំណោម៥ប្រកួត ហេតុនេះ លទ្ធផលស្មើសម្រាប់ក្រុមទាំងពីរ គួរតែជាការព្យាករដ៏ល្អបំផុត។

ជំនួបបីលើកចុងក្រោយរវាងក្រុមទាំងពីរ៖
25/04/11 Queens Park Rangers 1-1 Hull City
29/01/11 Hull City 0-0 Queens Park Rangers
12/04/08 Hull City 1-1 Queens Park Rangers

West Bromwich (WBA) v Sunderland 16/08/2014 ម៉ោង 9 យប់

បើយោងទៅតាមស្ថិតិពីការប្រកួតមុនបើករដូវកាលរវាងក្រុមទាំងពីរ ក្រុមភ្ញៀវ Sunderland ហាក់ធ្វើបានល្អប្រសើរជាង ខណៈដែលពួកគេបានកត់ត្រាជ័យជម្នះរហូតដល់ទៅ៤លើក ស្មើ១ និងចាញ់១ ក្នុងចំណោមការប្រកួតមិត្តភាព៦លើក ប៉ុន្តែ West Brom ចាញ់៣ និងឈ្នះ៣។ Sunderland មានការប្រែប្រួលគួរឲ្យកត់សម្គាល់ ក្រោមការដឹកនាំរបស់លោកគ្រូបង្វឹកថ្មី Gus Poyet ហេតុនេះ ពួកគេគួរតែអាចត្រឡប់មកផ្ទះវិញជាមួយនឹងការទទួលបានយ៉ាងហោចណាស់១ពិន្ទុ។

ជំនួបបីលើកចុងក្រោយរវាងក្រុមទាំងពីរ៖
08/05/14 Sunderland 2-0 West Bromwich(WBA)
21/09/13 West Bromwich(WBA) 3-0 Sunderland
23/02/13 West Bromwich(WBA) 2-1 Sunderland

Stoke City v Aston Villa 16/08/2014 ម៉ោង 9 យប់

Stoke ដែលជាក្រុមមានភាពខ្លាំងក្លានៅលើទឹកដីខ្លួនឯង នឹងត្រូវឈានទៅប្រកួតក្នុងរាត្រីនេះជាមួយនឹងក្តីសង្ឃឹមតិចតួចប៉ុណ្ណោះ ក្រោយពីពួកគេបានកត់ត្រាជ័យជម្នះត្រឹមតែ១លើកគត់ក្នុងចំណោមការប្រកួតមិត្តភាពមុនបើករដូវកាលចំនួន៦លើករបស់ពួកគេ ខណៈដែល Aston Villa បានទទួលជ័យជម្នះរហូតដល់ទៅ៤លើក ក្នុងចំណោម៦ប្រកួតដូចគ្នា។ ប៉ុន្តែ Stoke ធ្វើបានល្អប្រសើរជាងក្នុងចំណោមការជួបគ្នាចំនួន១៣លើករវាងក្រុមទាំងពីរ ដោយពួកគេបានទទួលជ័យជម្នះ៤លើក ខណៈដែល Aston Villa បានទទួលជ័យជម្នះត្រឹមតែ៣លើកប៉ុណ្ណោះ។ ខ្សែប្រយុទ្ធដ៏មុតស្រួចរបស់ Aston Villa គឺ Christian Bentake ហើយ Stoke មាន Peter Crouch។

ជំនួបបីលើកចុងក្រោយរវាងក្រុមទាំងពីរ៖
23/03/14 Aston Villa 1-4 Stoke City
21/12/13 Stoke City 2-1 Aston Villa
06/04/13 Stoke City 1-3 Aston Villa

West Ham United v Tottenham Hotspur 16/08/2014 ម៉ោង 9 យប់

នេះជាការប្រកួតរវាងក្រុមដែលស្ថិតក្នុងទីក្រុងឡុងដ៍ដូចគ្នា ហើយបើទោះបី West Ham មានប្រៀបដោយសារតែប្រកួតនៅលើទឹកដីខ្លួនឯងក៏ដោយ ប៉ុន្តែ ពួកគេដឹងថា វានឹងមិនងាយស្រួលនោះឡើយក្នុងការជួបក្រុមខ្លាំងដូចជា Spurs។ ក្នុងចំណោមការប្រកួតមិត្តភាព៧លើក West Ham កត់ត្រាជ័យជម្នះត្រឹមតែ១លើកគត់ ប៉ុន្តែ ចាញ់៣ និងស្មើ៣ ស្របពេលដែល Spurs កត់ត្រាជ័យជម្នះរហូតដល់ទៅ៤លើក ក្នុងចំណោមការប្រកួតមិត្តភាពមុនបើករដូវកាល៥លើក ក្នុងនោះរាប់បញ្ចូលទាំងការទទួលជ័យជម្នះ ២-១ លើក្រុម Schalke 04 ផងដែរ។

ជំនួបបីលើកចុងក្រោយរវាងក្រុមទាំងពីរ៖
03/05/14 West Ham United 2-0 Tottenham Hotspur
19/12/13 Tottenham Hotspur 1-2 West Ham United
06/10/13 Tottenham Hotspur 0-3 West Ham United

Leicester City v Everton 16/08/2014 ម៉ោង 9 យប់

Leicester នឹងខិតខំព្យាយាមបង្ហាញថា ការឈានទៅប្រកួតក្របខ័ណ្ឌកំពូលក្នុងនាមជាក្រុមបញ្ចប់ក្នុងចំណាត់ថ្នាក់លេខ១ក្នុងក្របខ័ណ្ឌលំដាប់ទី២របស់អង់គ្លេស មិនមែនជារឿងចៃដន្យឡើយ តាមរយៈការកត់ត្រាយ៉ាងហោចណាស់១ពិន្ទុក្នុងការប្រកួតជាមួយ Everton នៅថ្ងៃបើកឆាក។ Leicester ទទួលបានលទ្ធផលដ៏ល្អប្រសើរពីការប្រកួតមិត្តភាពមុនបើករដូវកាល តាមរយៈការកត់ត្រាជ័យជម្នះរហូតដល់ទៅ៦លើកក្នុងចំណោមការប្រកួត៧លើក ខណៈដែល Everton ដែលក៏ចាញ់ Leicester ១-០ ក្នុងការប្រកួតមិត្តភាពដែរនោះ ទទួលជ័យជម្នះតែ១លើកគត់ក្នុងចំណោម៦ប្រកួត។

ជំនួបបីលើកចុងក្រោយរវាងក្រុមទាំងពីរ៖
27/07/14 Everton 0-1 Leicester City
20/03/04 Leicester City 1-1 Everton
20/12/03 Everton 3-2 Leicester City

Arsenal v Crystal Palace 16/08/2014 ម៉ោង 11:30 យប់

ក្រោយពីឈ្នះពានរង្វាន់មុនបើករដូវកាល Community Shield តាមរយៈការយកឈ្នះក្រុមម្ចាស់ជើង Man City ៣-១ ក្រុមកាំភ្លើងធំ Arsenal នឹងខិតខំព្យាយាមបន្តការជឿជាក់របស់ខ្លួនតាមរយៈការផ្តួលក្រុម Crystal Palace នៅថ្ងៃបើកឆាកនៅ Emirates។ ខ្សែប្រយុទ្ធចំណូលថ្មី Alexis Sanchez អាចនឹងត្រូវចាប់ដៃគូជាមួយ Mesut Ozil និង Aaron Ramsey នៅតំបន់ប្រយុទ្ធដើម្បីនាំបីពិន្ទុសម្រាប់ក្រុមម្ចាស់ផ្ទះ ខណៈដែល Crystal Palace នឹងរីករាយ ប្រសិនបើពួកគេបណ្តោយឲ្យមានគ្រាប់បាល់ចូលទីរបស់ខ្លួនតិចជាងពីរគ្រាប់។

ជំនួបបីលើកចុងក្រោយរវាងក្រុមទាំងពីរ៖
02/02/14 Arsenal 2-0 Crystal Palace
26/10/13 Crystal Palace 0-2 Arsenal
15/02/05 Arsenal 5-1 Crystal Palace

Liverpool v Southampton 17/08/2014 ម៉ោង 7:30 យប់

កីឡាករ Adam Lallana, Dejan Lovren, Rickie Lambert នឹងត្រូវជួបអតីតមិត្តរួមក្រុមរបស់ខ្លួន នៅពេលដែល Liverpool ទទួលភ្ញៀវ Southampton។ បើទោះបី Liverpool បាត់លក់ចេញខ្សែប្រយុទ្ធដ៏មុតស្រួច Luis Suarez ទៅឲ្យ Barcelona ក៏ដោយ ប៉ុន្តែ ក្រុមនេះនៅតែមានភាពខ្លាំងក្រោមជំនួយដ៏ធំពីខ្សែប្រយុទ្ធ Daniel Sturridge និង Philippe Coutinho ជាដើម។ ក្រុមទាំងពីរបានទទួលលទ្ធផលល្អដូចគ្នាពីការប្រកួតមិត្តភាព ដោយ Liverpool ឈ្នះ៥ ពី៩ប្រកួត ខណៈ Southampton ឈ្នះ៥ពី៦ប្រកួត។

ជំនួបបីលើកចុងក្រោយរវាងក្រុមទាំងពីរ៖
02/03/14 Southampton 0-3 Liverpool
21/09/13 Liverpool 0-1 Southampton
16/03/13 Southampton 3-1 Liverpool

Newcastle v Manchester City 17/08/2014 ម៉ោង 10 យប់

Man City នឹងខិតខំព្យាយាមស្តារមុខមាត់ពីការបរាជ័យក្រោមស្នាដៃក្រុម Arsenal ក្នុង Community Shield ក្នុងពេលធ្វើដំណើរប្រកួតនៅលើទឹកដីក្រុម Newcastle។ បន្ទុកផ្សេងៗនឹងធ្លាក់ទៅលើ Sergio Aguero និង Yaya Toure ក្នុងការនាំជ័យជម្នះដល់ក្រុម ខណៈដែលខ្សែការពារចំណូលថ្មី Eliaquim Mangala នឹងព្យាយាមពង្រឹងនៅតំបន់ការងារ។ ក្នុងការប្រកួតមិត្តភាពមុនបើករដូវកាល Man City ឈ្នះ៤លើក ក្នុងចំណោម៧ប្រកួត ខណៈដែល Newcastle ឈ្នះ៥លើក ក្នុងចំណោម៨ប្រកួត។

ជំនួបបីលើកចុងក្រោយរវាងក្រុមទាំងពីរ៖
12/01/14 Newcastle 0-2 Manchester City
31/10/13 Newcastle 0-0 Manchester City
20/08/13 Manchester City 4-0 Newcastle

Burnley v Chelsea FC 19/08/2014 ម៉ោង 2 ទៀបភ្លឺ

Burnley ដែលជាក្រុមទើបឡើងមកពីក្របខ័ណ្ឌលំដាប់ទី២ នឹងផ្តោតតែទៅលើការពារក្នុងពេលជួបក្រុមខ្លាំង Chelsea ដែលចំណាយប្រាក់ជាច្រើនដើម្បីទិញចូលកីឡាករឆ្នើមៗដូចជា Diego Costa, Cesc Fabregas និង Filipe Luis។ ការទទួលជ័យជម្នះយ៉ាងកក់ក្តៅនៅថ្ងៃបើកឆាកសម្រាប់ Chelsea ដែលបានទទួលជ័យជម្នះ៦លើក ក្នុងចំណោមការប្រកួតមិត្តភាព៨លើក នឹងក្លាយជាប្រថ្នូលដ៏ល្អក្នុងការប្រជែងដណ្តើមពាន Premier League។ ការព្យាយាមគេចផុតពីការបរាជ័យដ៏ធំ នឹងក្លាយជារឿងដ៏រីករាយសម្រាប់ Burnley ដែលឈ្នះ៣លើក ក្នុងចំណោមការប្រកួត៥លើកមុនបើករដូវកាល៕

manchester-united-and-chelsea-expect-to-win-in-the-open-match-of-epl-1

ជំនួបបីលើកចុងក្រោយរវាងក្រុមទាំងពីរ៖
31/01/10 Burnley 1-2 Chelsea FC
29/08/09 Chelsea FC 3-0 Burnley
13/11/08 Chelsea FC 1-1 Burnley

Header Ads

ព្យាករណ៍ EPL សប្តាហ៍ទី១៖ Chelsea, Man United រំពឹងថានឹងឈ្នះនៅថ្ងៃបើកឆាក

Post a Comment

អត្ថបទអានច្រើន

Header Ads

ព្យាករ​ណ៍​ EPL​ ស​ប្តា​ហ៍​ទី​១៖​ Chelsea,​ Man​ United​ ​រំពឹង​ថា​នឹង​ឈ្នះ​នៅ​ថ្ងៃ​បើក​ឆាក​

Related Posts

Post a Comment

អត្ថបទអានច្រើន

ព្យាករណ៍ EPL សប្តាហ៍ទី១៖ Chelsea, Man United រំពឹងថានឹងឈ្នះនៅថ្ងៃបើកឆាក