Real Madrid នាំយកកីឡាករ ដែលមិនសូវ លេចធ្លោរ២០រូប ទៅលេងនៅ អាម៉េរិក

ក្រុងម៉ាឌ្រីដ៖ ក្រុមម្ចាស់ជើងឯកពាន UEFA Champions League ស្តេចស Real Madrid បាននាំយក កីឡាករវ័យក្មេង និងមិនសូវជាលេចធ្លោរ ចំនួន២០នាក់ ទៅចូលរួមក្នុងព្រឹត្តិការណ៍ ពានរង្វាន់ជើងឯក អន្តរជាតិ (International Champions Cup) ឆ្នាំ២០១៤ តាមការរៀបចំ និងអញ្ជើញរបស់អាម៉េរិក ក្រោមការឧបត្ថម្ភធំស្រាបៀរ Guinness ។

ការចេញដំណើរឆ្ពោះទៅទីក្រុង Los Angeles សហរដ្ឋអាម៉េរិកយប់មិញនេះ គ្រូបង្វឹកជនជាតិអ៊ីតាលី លោក Carlo Ancelotti បានកោះហៅតែ កីឡាករតែ២០នាក់ប៉ុណ្ណោះ សម្រាប់យុទ្ធនាការ នៅទឹកដីអាម៉េរិក លើកទី៦របស់ Real ក្នុង ជំនួបមិត្តភាពអន្តរជាតិ ប្រកួតចាប់ពីយប់ថ្ងៃស្អែក តទៅពីក្នុងពូល A ។

ក្នុងដំណើរប្រកួតជាលក្ខណៈ ទេសចរណ៍មុនរដូវកាលថ្មី ចាប់ផ្តើមនាខែក្រោយនេះ គេឃើញមាន កីឡាករសំខាន់២តែ រូបប៉ុណ្ណោះដែលទើបតែបញ្ចប់ ពីយុទ្ធនាការ World Cup ឆ្នាំ២០១៤ នៅប្រេស៊ីល មានខ្សែការពារ Pepe របស់ព័រទុយហ្គាល់ និងខ្សែបម្រើ Xabi Alonso របស់អេស្ប៉ាញ ក្នុងចំណោម កីឡាករសំខាន់៣រូបទៀត មានអ្នកចាំទី Diego Lopez, ខ្សែបម្រើប្រយុទ្ធជនជាតិវ៉េល Gareth Bale និងខ្សែប្រយុទ្ធវ័យក្មេង របស់អេស្ប៉ាញ Isco ។

Real Madrid ត្រូវលេងប្រកួតជម្រុះនៅក្នុងពូល A តតាំងជាមួយនឹងក្រុម Inter Milan នាថ្ងៃទី២៦ កក្កដា មុនជួបក្រុម AS Roma នាថ្ងៃទី២៩ កក្កដា និងមុនទៅជួប Man Utd របស់អង់គ្លេសនាថ្ងៃទី០២ សីហា ឆ្នាំ២០១៤ ដើម្បីស្វែងរក ២ក្រុមខ្លាំងឡើងទៅវគ្គពាក់កណ្តាលផ្តាច់ព្រ័ត្រ ។ សូមបញ្ជាក់ថា នេះជាលើកទី២ហើយ ដែលអាម៉េរិករៀបចំពាន ICC នេះឡើង ហើយការអញ្ចើញក្រុមខ្លាំង មកពីប្រទេស នៅតំបន់អឺរ៉ុបនោះ មិនកំណត់នោះទេ ខណៈដែល Real Madrid ជា ក្រុមការពារតំណែង ជើងឯក ឆ្នាំ២០១៣ ក្រោយពីបានយកឈ្នះ Chelsea ៣-១ នៅវគ្គផ្តាច់ព្រ័ត្រ ។

ខាងក្រោមនេះជាសមាសភាព ទាំង២០នាក់របស់ Real Madrid ត្រៀមប្រយុទ្ធនៅលើវាលស្មៅ សហរដ្ឋអាម៉េរិក៖

1. អ្នកចាំទីៈ Diego Lopez, Jesus និង Pacheco ។

2. ខ្សែការពារៈ Pepe, Carvajal, Coentrao, Arbeloa, Nacho, D. Liornte និង Derik ។

3. ខ្សែបម្រើៈ Bale, Xabi Alonso, Isco, Illarra, M. Liorente, Medran Lucas និង Mascarell ។

4. ខ្សែប្រយុទ្ធៈ Sobrino និង De Tomas ៕