កីឡាករ Connor Wickham និង លោក Tony Pulis ជាប់ជាកីឡាករ និងគ្រូបង្វឹកល្អប្រចាំខែមេសា

តំណែងជាគ្រូបង្វឹក និងកីឡាករឆ្នើមប្រចាំខែ មេសា ក្នុងក្របខណ្ឌ Barclays Premier League បានរកឃើញហើយ ដោយកីឡាករ Connor Wickham របស់ Sunderland និង លោក Tony Pulis ជាគ្រូបង្វឹកក្លឹប Crystal Palace ជាប់ជាកីឡាករ និងគ្រូបង្វឹកល្អប្រចាំខែមេសានេះ។
Tony Pulis and Connor Wickham

លោក Tony Pulis ត្រូវបានបោះឆ្នោតឲ្យជាប់ឈ្មោះជាគ្រូបង្វឹកប្រចាំខែមេសា បន្ទាប់ពីបានដឹកនាំក្លឹប Crystal Palace ឲ្យទទួលបានច័យជម្នះ ៤ លើកក្នុងចំណោមការប្រកួត ៥ លើកក្នុងខែនេះ។
ក្លឹបឥន្ទ្រីយ៍បានយកជ័យជម្នះលើក្លឹប Cardiff, Aston Villa, Everton និង West Ham ដែលបានជួយឲ្យក្រុមមួយនេះគេចផុតពីបំផុតកាត់ចោល។ ទោះជាយ៉ាងណាក្ដីកូនក្រុមរបស់លោក Pulis ទើបនឹងទទួលបរាជ័យក្រោមថ្វីជើងក្លឹបប្រជែងយកតំណែងជើងឯក Manchester City ដោយលទ្ធផល ២ ទល់នឹង ០ កាលពីសប្ដាហ៍មុន ដែលបានធ្វើឲ្យក្លឹបមួយនេះឈរនៅចំណាត់ថ្នាក់ទី១១ នៅ ក្នុងតារាងព្រីមីលីក ហើយមាន ១ ពិន្ទុតាមពីក្រោយក្រុមចំណាត់ថ្នាក់លេង១០ Stoke City។

ទោះជាយ៉ាងនោះក្ដី នេះជាពាងរង្វាន់ទី១ សម្រាប់លោក Pulis នៅក្នុងក្របខណ្្ឌ English Premier League។ ដោយឡែកអ្នកខ្លះយល់ថាអតីតគ្រូបង្វឹក Stoke City រូបនេះ គួរណាស់តែត្រូវបានគេគេបោះឆ្នោតឲ្យជាប់ជាគ្រូបង្វឹកឆ្នើមប្រ ចាំឆ្នាំផងដែរ បន្ទាប់ពីដឹកនាំក្លឹប Crystal Palace ឲ្យគេចផុតពីតំបន់កាត់ចោលហើយអាចបន្តការប្រកួតនៅក្នុងក្រប ខណ្ឌកំពូលមួយនេះបានជាបន្ដទៀត។
លោកគ្រូបង្វឹកវ័យ ៥៦ ឆ្នាំរូបនេះ បានធ្វើឲ្យមានការផ្លាស់ប្ដូរយ៉ាងច្រើននៅក្នុងក្លឹប ចាប់តាំងពីលោកបានមកដល់ទឹកដី Selhurst Park កាលពីខែ វិច្ឆិកា ឆ្នាំទៅ ខណៈដែលក្រុមមួយនេះកំពុងត្រូវបានគេមើលឃើញថានឹងធ្លាក់ចុះទៅ ក្របខណ្ឌ Championship វិញ។
Tony Pulis 2

កីឡាករ Connor Wickham របស់ Sunderland ត្រូវបានបោះឆ្នោតឲ្យជាប់ឈ្មោះជាកីឡាករឆ្នើមប្រចាំខែមេសា (Barclays Player of the Month) នេះផងដែរ បន្ទាប់ពីបានជួយក្រុមរបស់គាត់ឲ្យគេចផុតពីតំបន់កាត់ចោល ដោយរកបាន ៥ គ្រាប់ក្នុងចំណោមការប្រកួត ៤ លើកក្នុងអំឡុងខែនេះ។

កីឡាករវ័យ ២១ ឆ្នាំរូបនេះ រកបាន ២ គ្រាប់តែម្នាក់ឯងក្នុងជំនួបរវាងឆ្មាខ្មៅ និង Manchester City ដែលបានបញ្ចប់ក្នុងលទ្ធផល ២ ស្មើ។ ដោយឡែកមួយគ្រប់ទៀតកីឡាកររូបនេះរកបានក្នុងការប្រកួតជាមួយ ក្លឹបតោខៀវ Chelsea នៅ ក្នុងទឹកដី Stamford Bridge ដែលបានបញ្ចប់ក្នុងលទ្ធផលជ័យជម្នះ ២ ទល់នឹង ១។ ចំណែកគ្រាប់បាល់ ២ គ្រាប់ទៀតរកបាននៅពេលដែលក្លឹប Sunderland យកឈ្នះលើក្លឹប Cardiff City ដោយលទ្ធផល ៤ ទល់នឹង ០។

អតីតខ្សែប្រយុទ្ធក្លឹប Ipswich រូបនេះ បានជួយឲ្យក្រុមដែលដឹកនាំដោយលោក Gus Poyet មួយនេះបានគេចផុតពីតំបន់កាត់ចោល ដោយបានឡើងមកឈរនៅចំណាត់ថ្នាក់ទី ១៧ នៅក្នុងតារាងព្រីមីលីក ដោយមានពិន្ទុស្មើគ្នា ប៉ុន្ដែខុសគ្រាប់បាល់ស៊ុតបញ្ជូលទី ខណៈដែលការប្រកួតនៅសល់ ៣ លើកក្នុងដៃ។

ទោះជាយ៉ាងណាក្ដីកីឡាករ Wickham នឹិងប្រឹងប្រែងធ្វើឲ្យបានកាន់តែល្អ ខណៈដែលក្រុមរបស់គេត្រូវធ្វើដំណើរទៅកាន់ទឹកដី Old Trafford របស់Manchester United នៅរាត្រីនេះផងដែរ៕ DC
Connor Wickham 2