សំ វ៉ាន់ដេត៖ «គូប្រជែងសំខាន់របស់ស្វាយរៀងថ្ងៃនេះគឺត្រជាក់»
លោក សំ វ៉ានដេត គ្រូបង្វឹកក្រុមបាល់ទាត់ខេត្តស្វាយរៀង របស់កម្ពុជា ដែលកំពុងដឹកនាំក្រុមទៅប្រកួតជម្រុះក្នុងពានរង្វាន់ AFC President’s Cup 2014 ក្នុងពូល C នៅប្រទេសម៉ុងហ្គោលីថា ការប្រកួតថ្ងៃនេះជាមួយក្រុម Manang Marshyangdi Club របស់នេប៉ាល់នៅល្ងាចនេះគ្មានបញ្ហាចោទទេសម្រាប់ក្រុមលោក ប៉ុន្តែអ្វីដែលពិបាកសម្រាប់កីឡាករនៅទីនោះគឺត្រជាក់ខ្លាំងណាស់។
សន្និសិទ្នសារព័ត៌មានកាលពីម្សិលមិញ (រូបថត៖ FBប្រាក់ មុន្នីឧត្តម)
តាមពិតក្រុមកម្ពុជាត្រូវប្រកួតបើកឆាកជាមួយក្រុមម្ចាស់ផ្ទះ Erchim ទេ ប៉ុន្ដែថ្មីៗនេះខាងគណៈកម្មការរៀបចំកម្មវិធីប្រកួតមានការផ្លាស់ប្ដូរគូ។ ប្រកួតបើកឆាកនេះរវាងក្រុមទាំង ២ នឹងចាប់ផ្ដើមពីម៉ោង ៥ ល្ងាចតទៅ (ម៉ោង ៤ នៅកម្ពុជា) នៅវាលស្មៅកីឡដ្ឋាន Mongolia Football Federation Stadium ដោយមានផ្សាយផ្ទាល់តាមទូរទស្សន៍របស់ម៉ុងហ្គោលីថែមទៀតផង។
តាមទីតាំងភូមិសាស្រ្តនៅខែនេះនៅម៉ុងហ្គោលី ថ្ងៃរះនៅវេលាម៉ោង ៥ : ៣៥ នាទីព្រឹក និង លិចទៅវិញនៅម៉ោង ៨: ០៤ នាទីយប់។
ឆ្លើយឆ្លងតាមហ្វេសបុកមកពី ទីក្រុង Ulaanbaatar លោក សំ វ៉ាន់ដេត បន្ថែមថា ៖«ក្រុមយើងនៅទីនេះមិនមានជួបបញ្ហាបច្ចេកទេស ឬ អាហារ អ្វីនោះទេ តែរឿងសំខាន់តែមួយគត់គឺ ត្រជាក់ ព្រោះពេលថ្ងៃអាកាសធាតុ ត្រឹម ១២ អង្សាសេ បើពេលព្រឹកវិញគឺប្រហែល ២ ឬ ៣ អង្សាសេធ្លាក់មានធ្លាក់ព្រិលទៀត ហើយកីឡាករយើងមួយចំនួនហូរឈាមច្រមុះពេលហ្វឹកហាត់ទៀតផង»។
លោកគ្រូបង្វឹកកម្ពុជារូបនេះបន្តថា៖ «ដើម្បីខ្មែរតំណាងខ្មែរគាំទ្រខ្មែរ យើងជាខ្មែរទាំងអស់គ្នាខ្ញុំនឹងប្រឹងប្រែងអោយដល់ទីបញ្ចប់»៕
Post a Comment