ប៉ូលិសនិងកងសន្តិសុខមួកខ្មៅប្រើហិង្សាធ្វើឲ្យរបួសមនុស្ស៥នាក់ក្នុងទិវាពលកម្មអន្តរជាតិ
លោក អំ សំអាត ប្រធានផ្នែកស៊ើបអង្កេតអង្គការលីកាដូ ដែលតាមឃ្លាំមើលការប្រមូលផ្តុំ បានឲ្យដឹងថា អំពើហិង្សានោះកើតឡើងនៅក្រោយពេលមេដឹកនាំគណបក្សសង្គ្រោះជាតិបញ្ចប់ការថ្លែងសន្ទរកថារបស់ខ្លួននៅម៉ោងជាង ១០ព្រឹក និងបានអំពាវនាវដល់អ្នកគាំទ្រហែក្បួនទៅកាន់ទីស្នាក់ការរបស់ខ្លួនវិញ។
លោកបន្តថា នៅពេលថ្នាក់ដឹកនាំបក្សប្រឆាំង វិលពីការប្រមូលផ្តុំនៅក្បែរទីលានប្រជាធិបតេយ្យ ដែលហ៊ុំព័ទ្ធទៅដោយបន្លាលួស និងកងកម្លាំងបង្ក្រាបបាតុកម្មរដ្ឋាភិបាលរាប់រយនាក់ ក៏ឃើញមានកងសន្តិសុខមួកខ្មៅរបស់ខណ្ឌដូនពេញមានចំនួនរាប់រយនាក់បានចេញមកវាយសំពងទៅលើកម្មករ និងប្រជាពលរដ្ឋ ដែលមានវត្តមាននៅម្តុំស្ពាននាគ។
លោក អំ សំអាត ឲ្យដឹងថា អំពើហិង្សានោះបានបណ្តាលឲ្យមនុស្សចំនួន ៥នាក់រងរបួស ដោយអ្នករបួស ៣នាក់បានទៅរកសេវាព្យាបាលនៅពេទ្យអង្គការលីកាដូ នៅម៉ោង១១ថ្ងៃនេះ។
(សំឡេង លោក អំ សំអាត)
កងកម្លាំងសមត្ថកិច្ចបាននិយាយថា ការបង្ក្រាបរបស់ក្រុមខ្លួន ដោយសារតែការប្រមូលផ្តុំ របស់ក្រុមកម្មករ ឬប្រជាពលរដ្ឋទាំងនោះគ្មានច្បាប់អនុញ្ញាតិ និងប្រមូលផ្តុំបែបអនាធិបតេយ្យ។
ទិវាពលកម្មអន្តរជាតិឆ្នាំនេះ កម្លាំងចម្រុះរដ្ឋាភិបាលបានដាក់ពង្រាយរាប់ពាន់នាក់ និងគ្រប់ផ្លូវ ក្បែរស្ថាប័នសំខាន់ៗ នៃរាជរដ្ឋាភិបាល នៅទីក្រុងភ្នំពេញ។
ទោះមានការបង្ក្រាប និងរារាំងពីសមត្ថកិច្ចបែបណា ក្រុមមេដឹកនាំសហជីព និងកម្មករ បានដើរហែក្បួន យកញត្តិដាក់ជូនតំណាងគណបក្សប្រជាជនកម្ពុជា និងតំណាងគណបក្សសង្គ្រោះជាតិ ទៅដល់ទីស្នាក់ការគណបក្សនិមួយៗ ប៉ុន្ទាប់ពីបរាជ័យក្នុងការដាក់ញត្តិជូនរដ្ឋសភា នៅព្រឹកថ្ងៃទី១ ខែឧសភា ឆ្នាំ២០១៤៕
Post a Comment