វីដេអូស៊ុតញាក់សាច់ ក្នុងជំនួបយក្ស Real ស៊ី Bayern ១-០ យប់មិញ

ជំនួបយក្សវគ្គពាក់កណ្ដាល ផ្ដាច់ព្រ័ត្រ UEFA Champions League ជើងទី១ រវាង Real Madrid និង Bayern Munich យប់មិញនេះ បានបញ្ចប់ទៅក្នុងលទ្ធផលឈ្នះចាញ់គ្នាប្រផុតប្រផើយ ពោលគឺក្រុមម្ចាស់ផ្ទះ Real ស៊ីភ្ញៀវជើងឯកចាស់ Bayern ១-០។

Benzema អបអរក្រោយស៊ុតបញ្ចូលទី

១គ្រាប់ ជ័យជម្នះរបស់ក្រុមលោក Carlo Ancelotti នេះ ធ្វើបានដោយខ្សែប្រយុទ្ធបារាំង Karim Benzema នៅនាទី១៩ ក្រោយទទួលបាល់បញ្ជូនពី Fábio Coentrão។ លទ្ធផលនេះ ក៏ជាការបង្កើនកំណត់ត្រាឈ្នះក្នុងផ្ទះក្នុងពានរង្វាន់នេះដល់ ១៨ប្រកួតចុងក្រោយផងដែរ។

ទោះបីជា ចាញ់ក៏ពិតមែន ប៉ុន្តែក្រុមលោក Pep Guardiola បានគ្រប់គ្រងបាល់បានយ៉ាងច្រើនលើសលប់ ពោលគឺដល់ទៅ៧២ភាគរយ ខណៈ Real បានតែ២៨ភាគរយប៉ុណ្ណោះ។ មួយវិញទៀត បើគិតពីចំនួនបញ្ជូនបាល់ ក៏ Bayern លើសដាច់នោះដែរ ពោលគឺ ៧០៥ ទល់នឹង ២៧៦ ខណៈបាល់ជ្រុងវិញ គឺ Bayern ១៥ដង ឯ Real បាន៣ដង។

យ៉ាងណា ក្ដី ការគ្រប់គ្រងបាល់បានច្រើនប៉ុន្តែមិនអាចស៊ុតចូលនៅក្រៅផ្ទះនេះ នឹងធ្វើឲ្យក្រុមជើងឯកចាស់មួយនេះត្រូវធ្វើការធ្ងន់ពេលទៅលេង នៅដីខ្លួនឯងនាសប្ដាហ៍ក្រោយ។

សម្រាប់ ប្រិយមិត្តវិញ មានពាក្យអ្វីនិយាយពីការប្រកួតនេះដែរឬទេ? តើ Bayern អាចវាយបកដើម្បីឡើងទៅការពារពានរបស់ខ្លួនបានឬអត់?