កូរ៉េខាងត្បូង ឬ អូស្រ្ដាលី លើកពាន Asian Cup ល្ងាចនេះ?

ការប្រកួតបាល់ទាត់ដណ្ដើមជើងឯកទ្វីបអាស៊ី ឬ AFC Asian Cup ឆ្នាំ២០១៥ បានឈានដល់វគ្គផ្ដាច់ព្រ័ត្រហើយនាម៉ោង៤:០០ល្ងាចនេះ ដោយក្រុមម្ចាស់ផ្ទះអូស្រ្ដាលី ប៉ះក្រុមមិនដែលចាញ់ កូរ៉េខាងត្បូង។

ក្រុមទាំង២បានប៉ះគ្នាម្ដងរួចមកហើយនៅក្នុងវគ្គសន្សំពិន្ទុ តាមពូល ដោយក្រុមកូរ៉េខាងត្បូង យកឈ្នះប្រផុតប្រផើយ ១-០។ មុនឈានដល់វគ្គចុងក្រោយនេះ ក្រុមទាំង២ សុទ្ធតែឈ្នះគូប្រកួត ២-០ ដូចគ្នាកាលពីវគ្គពាក់កណ្ដាលផ្ដាច់ព្រ័ត្រ។

លោក Ange Postecoglou នឹងព្យាយាមធ្វើយ៉ាងណាដឹកនាំអូស្រ្ដាលីឲ្យស្គាល់ជាតិពានរង្វាន់ នេះជាលើកដំបូង ក្រោយចាញ់ជប៉ុននៅវគ្គផ្ដាច់ព្រ័ត្រឆ្នាំ២០១១ក្នុងម៉ោងបន្ថែមទាំង គួរឲ្យសោកស្ដាយ។ ចំណែកកូរ៉េខាងត្បូងវិញ ក៏នឹងប្រឹងធ្វើយ៉ាងណាអាចឈ្នះពាននេះជាថ្មីផងដែរ ក្រោយខកខានអស់រយៈពេល៥៥ឆ្នាំមកហើយ។

កំណត់ត្រាសំខាន់ៗមួយចំនួនទាក់ទងក្រុមទាំង២៖

កូរ៉េខាងត្បូង ធ្លាប់លើកពាន AFC Asian Cup ២ដង តែតាំងពីឆ្នាំ ១៩៥៦ និងឆ្នាំ១៩៦០។

បន្ទាប់ពីលើកពាន២ដងនោះមកហើយ ក្រុមដែលមានរហស្សនាមថា The Red Devils នេះ បានចាញ់វគ្គផ្ដាច់ព្រ័ត្រ៣ដង គឺចាញ់អ៊ីរ៉ង់ ឆ្នាំ១៩៧២, ចាញ់គុយវ៉ែត ឆ្នាំ១៩៨០ និងចាញ់អារ៉ាប៊ីសាអ៊ូឌីត ឆ្នាំ១៩៨៨។

អូស្រ្ដាលី បានឡើងដល់វគ្គផ្ដាច់ព្រ័ត្រនៅកាតារ ឆ្នាំ២០១១ ដោយចាញ់ជប៉ុន ១-០ ក្នុងម៉ោងបន្ថែម១៥នាទី២ដង។

នេះជាការជួបគ្នាលើកទី៣នៃក្រុមទាំង២ក្នុងប្រវត្តិ AFC Asian Cup ដោយ២ដងកន្លងមក កូរ៉េខាងត្បូង ឈ្នះ១ ស្មើ១។

កូរ៉េខាងត្បូង មិនទាន់របូតគ្រាប់បាល់មួយគ្រាប់ណាឡើយក្នុង Asian Cup ឆ្នាំ២០១៥នេះ ដោយឈ្នះទាំង៥ប្រកួត។