ព្រាប សុវត្ថិ ដើរចេញពីហង្សមាស?
ភ្នំពេញៈ បន្ទាប់ពីបែកធ្លាយដំណឹងនៃការត្រៀមដើរចេញពីផលិតកម្មរស្មីហង្សមាស របស់តារាចម្រៀង ព្រាប សុវត្ថិ ទៅចូលផលិតកម្មថោន កាលពីប៉ុន្មានសប្តាហ៍មុននោះ នៅពេលនេះទស្សនិកជនកំពុងទន្ទឹងរង់ចាំមើលថា តើ ព្រាប សុវត្ថិ ពិតជាចាកចេញទៅផលិតកម្មថោន មែន ឬក៏តារារូបនេះនៅតែរក្សាជំហររស់នៅទ្រនំដដែល ខណៈពេលនេះ ប្រភពច្បាស់ការណ៍មួយបានបញ្ជាក់ថា ព្រាប សុវត្ថិ កំពុងរារែក ដោយសារតែតារារូបនេះបានត្រៀមបង្វេចដើរចូលផលិតកម្មថោនហើយ តែបែរជាផលិតកម្មរស្មីហង្សមាស ព្យាយាមចរចាជាមួយតារារូបនេះជាថ្មីម្តងទៀត។
តាមរយៈដំណឹងទើបតែធ្លាយចេញមួយនោះបានឲ្យដឹងថា តារាចម្រៀងលោក ព្រាប សុវត្ថិ គ្រោងនឹងដើរចេញពីផលិតកម្មរស្មីហង្សមាសជាផ្លូវការហើយនៅពេល ខាងមុខដ៏ខ្លី ហើយលោកនឹងត្រូវបានផលិតកម្មថោន ដែលមានវ័យក្មេងខ្ចីជាងគេបើកទ្វារចាំទទួលដៃពីរ។
តាមប្រភព នោះបានឲ្យដឹងថា ក្រោយពេលតារាចម្រៀង ព្រាប សុវត្ថិ ឈានជើងចូលដល់ផលិតកម្មថោនភ្លាម ថោន នឹងរៀបចំធ្វើសន្និសីទសារព័ត៌មានដ៏ធំមួយ ដើម្បីបញ្ជាក់ប្រាប់ពីវត្តមាន និងផ្តល់ភាពកក់ក្តៅដល់តារាចម្រៀងរូបនោះ។
ទោះបីជាមានការ លើកឡើងពីការដើរចេញរបស់តារាចម្រៀងមានតម្លៃខ្លួនខ្ពស់ដាច់គេ លោក ព្រាប សុវត្ថិ ក្តី តែប្រភពអ្នកសិល្បៈរូបនោះមិនបានបញ្ជាក់ឡើយថា ការដើរចេញនោះបណ្តាលមកពីមូលហេតុអ្វីនោះទេ ពោលគឺគ្រាន់តែដឹងតាមរយៈការខ្សឹបខ្សៀវសួរគ្នាប៉ុណ្ណោះ។ តែយ៉ាងណាគេដឹងថា លោក ព្រាប សុវត្ថិ ទំនងជាអន់ចិត្តនឹងផលិតកម្មរស្មីហង្សមាស ដែលគ្មានអ្នកផលិតបទចម្រៀងជើងចាស់ណាម្នាក់អាចធ្វើបទឲ្យលោក ច្រៀងបានល្បីដូចមុន។
ប៉ុន្តែទាក់ទិននឹងការសម្រេចចិត្តដើរចេញ របស់តារាចម្រៀងរូបនោះ ប្រភពថ្មីមួយពីផលិតកម្មរស្មីហង្សមាសបានបង្ហើបឲ្យដឹងថា កាលពីមុនលោក ព្រាប សុវត្ថិ បានសម្រេចចិត្តច្បាស់ ១០០ ភាគរយថា នឹងចេញពីហង្សមាស ចូលផលិតកម្មថោន តែនៅពេលនេះ អ្វីៗកំពុងស្ថិតនៅក្នុងភាពស្រពេចស្រពិលនៅឡើយ។ ប្រភពនោះបានបញ្ជាក់ថា ព្រាប សុវត្ថិ ទំនងជាបានចុះកុងត្រាជាមួយនឹងផលិតកម្មថោន ហើយ តែលោក ព្រាប សុវត្ថិ កំពុងគិតសាជាថ្មី នៅពេលដែលផលិតកម្មរស្មីហង្សមាស ព្យាយាមអូសទាញលោកមកវិញ។
ប្រភពដដែលបានបញ្ជាក់ថា នៅពេលនេះ ការសម្រេចចិត្តរបស់លោក ព្រាប សុវត្ថិ កំពុងស្ថិតក្នុង ៥០ និង ៥០ មានន័យថា នៅកណ្តាលនៅឡើយ លោកនៅរារែក មិនទាន់ដឹងថា ត្រូវទៅថោន ឬបន្តនៅហង្សមាសនៅឡើយ។ តែយ៉ាងណាមិញ គេបានឃើញយ៉ាងច្បាស់ថា លោក ព្រាប សុវត្ថិ បានឡើងច្រៀងជាមួយតារារបស់ថោន នៅលើឆាកប្រគំតន្ត្រីមួយរបស់ផលិតថោននៅខេត្តសៀមរាប កាលពីថ្ងៃបុណ្យចូលឆ្នាំថ្មីឆ្នាំ២០១៤កន្លងមកនេះ។
ពាក់ព័ន្ធនឹងការលើកឡើងគួរឲ្យភ្ញាក់ផ្អើលពីការសម្រេចចិត្តរបស់ លោក ព្រាប សុវត្ថិ ដើរចេញពីទ្រនំនោះ មុននេះលោកហាក់ដូចជាមិនចង់ផ្តល់ការសម្ភាស។
ជុំវិញបញ្ហានេះ លោក មាស សុខរតនៈ អ្នកគ្រប់គ្រងទូទៅនៅផលិតកម្មថោន ក៏ហាក់ដូចជា មិនចង់និយាយលម្អិតនោះដែរ។
ប៉ុន្តែទោះបីយ៉ាង ណា អ្នកគ្រប់គ្រងផលិតកម្មរស្មីហង្សមាស បានចេញមុខមកបញ្ជាក់ថា ដំណឹងនៃការត្រៀមចាកចេញរបស់លោក ព្រាប សុវត្ថិ ពីផលិតកម្មរស្មីហង្សមាស គ្រាន់តែជាពាក្យចចាមអារ៉ាមគ្មានការពិតប៉ុណ្ណោះ។ លោក អ៊ឹង សុងលាភ បាននិយាយថា៖ «អូ! រឿងហ្នឹង គឺអត់ពិតផង ជាពាក្យចចាមអារ៉ាម…»។
ជាមួយ គ្នានោះ លោក អ៊ឹង សុងលាភ បានបញ្ជាក់ថា តាំងពីដើមកន្លងមករវាងផលិតកម្មរស្មីហង្សមាស និងលោក ព្រាប សុវត្ថិ មិនដែលមានភាពល្អក់កករនឹងគ្នាទេ ដូច្នេះក៏គ្មានមូលហេតុអ្វីដែលលោក ព្រាប សុវត្ថិ ត្រូវដើរចេញពីហង្សមាស ដែរ។
អ្នកគ្រប់គ្រងផលិតកម្មរស្មីហង្សមាសរូបនេះបាននិយាយថា៖ «យើងអត់ដែលមានបញ្ហានឹងគ្នាទេ បទចម្រៀងរបស់គាត់មានចេញលក់លើទីផ្សារជាហូរហែ ហើយគាត់ក៏ទើបចេញអាល់ប៊ុមថ្មីផងដែរ។ ខ្ញុំអត់ដឹងថា មានពាក្យចចាមអារ៉ាមមកពីណាទេ តែយើងបានធ្វើការជាមួយគ្នាយ៉ាងរលូន»។
ទោះបីយ៉ាងណា ការពិតថា តើលោក ព្រាប សុវត្ថិ ដើរចេញ ឬមិនដើរចេញ នឹងបានដឹងនៅពេលដ៏ខ្លីខាងមុខនេះ បើលោកចាកចេញមែន ប្រាកដណាស់នឹងមានការធ្វើសន្និសីទសារព័ត៌មានដូចការលើកឡើង។ តែបើតាមប្រភពចុងក្រោយបញ្ជាក់ថា ក្រោយចរចា ព្រាប សុវត្ថិ ទំនងនឹងមិនចាកចេញទេ៕
Post a Comment