វៀតណាមដកខ្លួន មិនទទួលរៀបចំអាស៊ីហ្គេម នៅឆ្នាំ២០១៩
រដ្ឋាភិបាលវៀតណាមបានប្រកាស កាលពីថ្ងៃព្រហស្បតិ៍ ទី ១៧មេសា ថា នឹងដកខ្លួន មិនធ្វើជាម្ចាស់ផ្ទះ រៀបចំទទួលល្បែងអាស៊ីហ្គេម ដែលវៀតណាមបានទទួលសិទ្ធិធ្វើ នៅឆ្នាំ ២០១៩នោះទេ។ អាជ្ញាធរវៀតណាមបានលើកឡើងពីហេតុផលវិបត្តិថវិកា ដើម្បីពន្យល់ពីការដកខ្លួនរបស់វៀតណាម ពីការប្រកួតកីឡាប្រចាំតំបន់មួយនេះ។
កាលពីឆ្នាំ ២០១២ នៅពេលដែលវៀតណាមបានជាប់ឆ្នោត ឲ្យធ្វើជាម្ចាស់ផ្ទះ ទទួលរៀបចំការប្រកួតកីឡាអាស៊ីហ្គេម នៅឆ្នាំ ២០១៩ ប្រជាជនវៀតណាម ជាពិសេស មន្រ្តីរដ្ឋាភិបាលបានអបអរស្វាគម ភ្លូកទឹក ភ្លូកដី។ វៀតណាមបានផ្តួលឥណ្ឌូណេស៊ី ដោយទទួលបានការបោះឆ្នោតជ្រើសរើសឲ្យទទួលធ្វើកីឡាអាស៊ីហ្គេម។ កាលណោះ រដ្ឋាភិបាលត្រេកអរ និងសង្ឃឹមថា ការរៀបចំប្រកួតកីឡាអាស៊ីហ្គេមនឹងជាឱកាសសម្រាប់កែលម្អ អភិវឌ្ឍ ហេដ្ឋារចនាសម្ព័ន្ធក្នុងស្រុកវៀតណាម។ ប៉ុន្តែ នៅពីរឆ្នាំ ក្រោយ គឺរដ្ឋាភិបាលកុម្មុយនិស្តវៀតណាម ដដែល ដែលបានជូនដំណឹងថា វៀតណាមត្រូវដកខ្លួន មិនទទួលរៀបចំការប្រកួតកីឡាអាស៊ីហ្គេម ទៅតាមការគ្រោងទុក នៅឆ្នាំ ២០១៩។
នៅក្នុងសេចក្តីថ្លែងការណ៍ ដែលចុះផ្សាយ នៅក្នុងវិបសៃតិ៍របស់រដ្ឋាភិបាល គេបានសរសេរថា វៀតណាមនឹងធ្វើការជាបន្ទាន់ ជាមួយគណៈកម្មាធិការអូឡាំពិកអាស៊ី ដើម្បីសុំដកខ្លួន មិនរៀបចំកីឡាអាស៊ីហ្គេម។ តាមសេចក្តីថ្លែងការណ៍ដដែល កង្វះបទពិសោធន៍ ក្នុងការរៀបចំព្រឹត្តិការណ៍ប្រកួតកីឡា និងផលលំបាកក្នុងផ្នែកសេដ្ឋកិច្ចសង្គមបច្ចុប្បន្ន គឺជាឧបសគ្គ មិនអាចឲ្យវៀតណាមទទួលធ្វើជាម្ចាស់ផ្ទះ រៀបចំការប្រកួតកីឡាអាស៊ីហ្គេម។ នៅអនាគត វៀតណាមនឹងទទួលរៀបចំកីឡាអាស៊ីហ្គេម នៅពេល ពេលវេលា កាលៈទេសៈតម្រូវឲ្យ។
តាមមន្រ្តីរដ្ឋាភិបាល គេត្រូវការថវិកាប្រមាណ ១៥០លានដុល្លារ សម្រាប់រៀបចំ កីឡាអាស៊ីហ្គេមលើកទី ១៨។ នោះ ដោយមិនរួមបញ្ចូលការសាងសង់ហេដ្ឋារចនាសម្ព័ន្ធ និងសំណង់ផ្សេងៗទេ។ មន្រ្តីទទួលបន្ទុកកីឡាអូឡាំពិកវៀតណាមបានប៉ាន់ប្រមាណថា កីឡាអាស៊ីហ្គេមដែលមានរយៈពេល ១៦ថ្ងៃ មានតម្លៃសរុបប្រមាណ ៣០០លានដុល្លារ។ តម្លៃនេះ បានធ្វើឲ្យរដ្ឋាភិបាលកុម្មុយនិស្តរួញខ្លួន លែងចង់ទទួលរៀបចំ កីឡាអាស៊ីហ្គេម។ វិបត្តិសេដ្ឋកិច្ច និងការចុះអន់ថយសមត្ថភាពរបស់កីឡាកររឹតតែជំរុញឲ្យរដ្ឋាភិបាលដកខ្លួន។ ជាពិសេស នៅពេលដែលកាសែតរដ្ឋ ជាច្រើនបានសរសេររិះគន់ផែនការចំណាយលុយសន្ធឹកសន្ធាប់ ទៅលើកីឡាអាស៊ីហ្គេម។ កាសែត អ្នកសរសេរBlog ជាច្រើនបានទាមទារឲ្យរដ្ឋាភិបាលបង្វែរថវិកាខាងលើសម្រាប់វិស័យជាអាទិភាព ដូចជា អប់រំ និងផ្លូវថ្នល់ជាដើម។
នៅមួយរយៈចុងក្រោយនេះ សេដ្ឋកិច្ចវៀតណាមចុះអន់ថយបន្តិច ដោយសារកំណើនសេដ្ឋកិច្ចធ្លាក់ចុះ ដែលជាលទ្ធផលនៃអំពើពុករលួយ និងការគ្រប់គ្រងគ្មានប្រសិទ្ធិភាពទៅលើក្រុមហ៊ុនរដ្ឋ។
កីឡាអាស៊ីហ្គេមនៅឆ្នាំ នេះ នឹងត្រូវប្រព្រឹត្តទៅជាធម្មតា នៅប្រទេសកូរ៉េខាងត្បូង នៅទីក្រុងIncheon ចាប់ពីខែកញ្ញា ដល់ខែ តុលា៕
ប្រភពពី វិទ្យុបារាំងអន្តរជាតិ
Post a Comment